LADC sawrkar fiahna nei turin thutkhawm ko

Mizoram Larsap Gen. (Rtd) Vijay Kumar Singh-n’n Lai Autonomous District Council (LADC)-a Floor Test nei tura thu a pek angin LADC Chairman T. Zakunga chuan May ni 16-a thutkhawm nei turin a ko.

Larsap in LADC thutkhawma Floor Test neih tur chungchanga thuchhuah tarlan danin tunhnaia BJP leh a thurualpui MNF thawhdunna United Democratic Alliance (UDA) chu sawrkarna an siam thei a ni tih finfiahna Floor Test nei tura tih an ni a, hetah hian BJP kaihhruai sawrkar chuan thlawptu an nei tam tawk em tih finfiah a ni dawn a ni.

Larsap hian Floor test neih tur chungchangah hian May ni 8 khan thuchhuah siamin a rang thei ang bera buatsaih turin thu a pe a, a tuk May ni 9-a thuchhuah tarlan danin LADC Session koh nan hun pek belh an nih thu leh Session chu May ni 16 hma ngeia ko turin hriattirna pek an ni a, hemi chungchangah hian LADC Chairman T. Zakunga chuan May ni 8 khan thuchhuah siamin LADC Session chu May ni 16 chawhma dar 10:30 a neih turin a ko a ni. Tarlan tawh angin hun engemaw chen LADC-a sawrkar mumal a din theih loh avangin boruak a tang chho reng a, BJP leh MNF thawhdunna, United Democratic Alliance (UDA) atangin CEM atan MDC N. Zangura Governor in a ruat hnuah May ni 8 khan CEM atan N. Zangura hi rinawmna thu tiamtira lakluh a ni.