Mizoram-a Zu hlauhawm nia sawite mihring tana a hlauhawm zia chipchiar taka pholang turin zirchian a ni

Excise and Narcotics Minister Lalnghinglova Hmar chuan Mizoram-a Zu hlauhawm nia sawite mihring tana a hlauhawm zia chipchiar taka pholang turin Delhi-a Central Laboratory-ah endik tura hmalak mek a nih thu sawiin, Aizawl khawpui laili a ruihhlo ti leh ruihhlo ngai awmte tireh turin hmalak reng a nih thu a sawi bawk.

Nimin-a Mizoram Assembly Session zawhna leh chhanna hunah Champhai South bialtu, Lt. Col. Clement Lalhmingthanga zawhna chhangin Excise & Narcotics Department changtu Minister Lalnghinglova Hmar chuan, Aizawl chhehvela Zu hmunpui ni-a sawi, Rangvamual, Phunchawng leh Tuikhurhlu-a zu te chu dan phal lohva siam leh zawrh vek a nih thu leh heng zu siam leh zuar te bakah a in te chu dan tlawhchhana man zel an ni tih a sawi a. Kumin January ni 20 khan Mizoram Police te nen Joint Operation neiin mi 150 lai man an ni tih sawiin, Zu siamna hmun 101 lai tichhiain Rakzu litre 1083, Zu bilhlai Tin 25,556 leh Zu bilhna Bel lian 96 tihchhiat a nih thu a sawi a, Mizoram-a Zu siamchhuah te chu nunna atan a hlauhawm bik ni-a sawi a awm avangin Zu sample chu New Delhi-ah zirchian mek a ni a, result a la chhuak lo tih a sawi bawk.

END Minister chuan Aizawl khawpui laili tak taka ruihhlo ti leh ruihhlo ngai la awmte tireh turin sawrkarin hma a la reng tih sawiin, “Excise, Police leh Central YMA hmalakna in addict thahnem tak man khawmin, Jail leh Rehabilitation Home hrang hrangah dah luh an ni,” a ti a, ruihhlo ngaite chu an awmna thina hnawhkian an nihin hmundang an pan leh thin thu sawiin, “Darkar 24 chhung kan duty thei lo, duty awm lo chiahin an kal leh mai thin. Tin, heng mite hian awmna hmun an mamawh ve si a ni,” a ti a, an tan hian ngaihtuahna sen a ngaih takzet thu a sawi.

Excise Minister sawi danin, Aizawl luhka, Vaivakawn huamchhung, Sairang road-a 'A Senchi lane' an tih mai thina addict awmkhawm leh zu zuar thinte chu Excise Department leh Vaivakawn khawtlangin chhun zan zawma thutchilhin, an thianfai viau tawh. Hetiang chiah hian hmundang pawh beihzel tum mek a ni bawk.