Thuthar thehdarhtute sawrkar kal dan dik lo te ziak a, fakseltu tha ni zel turin chah

Home Minister K. Sapdanga chuan thuthar thehdarhtute chu sawrkar fakna ziak kur nguai lova, a kal dan dik lo te ziak a, fakseltu tha ni zel turin a chah.

Home Minister hian tunkar Nilaini khan Mizoram Journalists’ Association (MJA) General Conference vawi 51-na chu Champhai-a I&PR Auditorium-ah hmanpuiin Mizoram Journalists’ Association chu pawl hlun leh pawimawh tak, an eizawnna hmanga khawtlang rawngbawltu leh sawrkar khalh ngil thin tute awmna a nih thu a sawi a. Thuthar thehdarhtute chu Democracy sawrkar lungphum palina, 4th Estate of Democracy an nih angin sawrkar fakna ziak kur nguai lova, a kal dan dik lo te ziak a, fakseltu tha ni zel turin a chah a. “Thuthar thehdarhtute hnen atanga sawrkar fakselna ka hmuh hian ka lawm thin a ni,” a ti. Home Minister K. Sapdanga chuan Mizoram mamawh ber chu siamtharna (reformation) ni a a hriat thu sawiin, hemi kawngah hian MJA member-te chu tan la thar turin a chah a. Khawtlang kal dan siamthat kawngah te, politics leh mipuite rilru sukthlek siamthat kawngah te chanchinbumi te chu thawhhlawk thei ber tura a ngaih thu pawh sawiin, ziak ngeia dah thu chuan chungchuanna bik a neih thu a sawi bawk a ni.

Home Minister chuan Digital Media chak tawh tak karah Print/Traditional Media ten harsatna an tawk mek a ni tih a hriatpui thu sawiin, heng karah pawh chanchinbu tichhuak a, soft copy tal pawha an chhuah thin chu fakawm a tih thu a sawi a. Chanchinbu sem leh tihchhuah dan chu eng pawh ni se, a enkawltute ngaihtuahna leh thawhrimna lang thin chu a ropui ber lai a nih thu a sawi a. Print Media-in hlutna leh tlona danglam bik tak a neih avangin khawvelin ziaka dah ngei media hi a mamawh hun a thlen leh ngei a beisei thu a sawi bawk.

MJA General Conference hi MJA General Hqrs. a Vice Presicent C. Lalhmachhuana chuan kaihruaiin MJA President C. Lalrambuatsaiha pawhin Mizo hnam inpumkhat a pawimawh thu a sawi a. MJA member-te chu teirei peihna leh insumtheihna nei turin a fuih bawk a. He hunah hian kum 2024-2025 chhunga an Member boral mi 4 te sunna hun hmangin Prominent Journalist atan K. Zothankhuma (Editor, Virthli); T. Lalhmachhuana (Editor, Dingdi) leh CS. Chawngchhuma (Editor, Hnamdamna, Lunglei) te puan an ni a. Mizoram sawrkar in Journalist pension Scheme a siam thar anga Pension-a chhuak turte hnenah thlahna thuziak hlan an ni bawk.

Mizoram Journalists’ Association (MJA)-ah hian tun dinhmunah Member 195 awm mekin heng zinga mi 102 te chu General Hqrs. hnuaia awm niin midang 93 te chu District hrang hranga awm an ni a, he Conference-ah hian Serchhip District atangin mi 12 an kal a ni.