Sawhthing leina man pek kim a la ni lo tih Agriculture Minister in a sawi

Agriculture Minister PC. Vanlalruata chuan Sawhthing lei tawhna man pek kim a la ni loh thu Assembly House hrilhin, kum 2023-2024 kumtawp dawna cheng vbc 110 dah chu hman zawh a la nih loh avangin Financial Year 2024-2025 chhungin thlai thar leina tur pawisa ruahmanna hran siam a ni lo tih a sawi.

Nimin-a Assembly thutkhawm zawhna leh chhanna hunah Agriculture Minister PC. Vanlalruata chuan member te zawhna chhangin Sawhthing an buk tawh engemaw zat man chu ni 7 chhungin pek nghal a ni tih a sawi a, hetihrual hian Sawhthing Collection Centre-ah Sawhthing buk tawh si, a man la tihfel loh a la awm tih sawiin, nakin zelah sawrkar a inrawlh loh hunah loneitute hnenah thlai hralhna man a luh nghal theihna turin an inzirtir chho mek tih a sawi a, loneitu Bank Account la nei remchang lo te chu an Sawhthing hralhna man Society Account-ah a lut tih a sawi bawk.

India-ah Sawhthing rate a hniam avangin Mizoram sawrkar chuan kuthnathawktute hnenah Sawhthing leina, Support Price Rs. 50 a pe nghal tih Agriculture Minister chuan a sawi bawk a, Sawhthing dahna tur bag pakhat cheng 10 zela leiin a thlawnin kuthnathawktute hnenah a pe tih a sawi a, kuthnathawktu te’n Sawhthing an tharna hmun atanga Secondary Collection Centre-a an phurh thlen man chu Sawhthing neitute emaw, Society emaw te tum tur a ni a, tun dinhmun ah Secondary Collection Centre dah belh tumna a awm rih lo tih a sawi bawk.

Agriculture Minister PC. Vanlalruata chuan Financial Year 2023-2024 kumtawp dawn a cheng vbc 110 dah chu hman zawh a la nih loh avangin kumin Financial Year 2024-2025 chhungin thlai thar leina tur pawisa ruahmanna hran siam a ni lo tih a sawi a, sawrkar chuan cheng vbc. 110 atangin thlai thar lei nan cheng vbc. 28 an hmang tawh tih sawiin, sawrkar chuan Aieng tharchhuaktuten a sawngbawltute hnena an hralh theih hun atan kumin January thla atanga May thla inkar a ruahman sak tih a sawi a, Aieng hring chu a sawngbawltu hnenah kg khatah Rs. 20 a an hralh theihna turin an ruahman tih a sawi bawk.