Myanmar lam atanga dan lova Kuhva tawlhruk chingte an tawmim tawh hle - Chief Minister

Chief Minister Lalduhoma chuan Myanmar lam atanga dan lova Kuhva tawlhruk chingte an tawmim tawh hle-a a hriat thu sawiin, “Zaa za han tihrem nghal barh chu a la harsa deuh a, kan la bei zel dawn a ni,” tiin Mizoram ramngaw tha sawp chhetu tlangram lo nei thlakna tha tak chu kuhva chin leh rubber chin a nih thu a sawi bawk.

Land Resources Soil & Water Conservation Department buatsaih Science thiamna hmanga kuhva rah chin dan inzirtirna hun nimin-a ATI Auditorium, Aizawl-a neih a hmanpuina ah Chief Minister Lalduhoma chuan Myanmar lam atanga dan lova Kuhva lakluh a nih thin avangin kan ram a Kuva chingtuten an hralh tha hlei thei lo tih a sawi a. “Sawrkarna kan rawn lak veleh in harsatna te tihtawp tumin hma kan la nghal chat a ni. Kan Home Minister pawh a tang hle a, man pawh kan man nasa. Vawiin-ah chuan a tawlhruk chingte pawh an tawmim tawh hlein ka hria. Zaa za han tihrem nghal barh chu a la harsa deuh a, kan la bei zel dawn a ni,” a ti a. “In harsatna chinfelna leh hlawk zawka Kuhva in hralh theih nan a process-na lam hi i din ve ang u, kan ti a. NEC-ah cheng vbc. 7.43 kan thehlut a, min rawn sanction tawh a. Chemphai-ah leh Zamuang-ah Kuhva Processing Unit din kan tum, khawl hmangin kan tiro ang a, a khehna kawrin leitha kan siam ang a, a rah hmin thate a Skop ah kan siam ang a, a hawngte chu plate-ah siam kan tum bawk,” a ti.

Chief Minister chuan Tlangram vat-a Lo neih kan la uar hle tih pawh sawiin, “A hlawk si lova, ram a tichhe nasa bawk si a. Huan nghet neia hmalak hi a tul hle. Chutianga tana tha chu Kuhva hi a ni. Kan sik leh sa a inthlak zel avangin Mamit leh Kolasib-ah chauh ni lovin District dangah pawh a chin chhoh theih tan a ni. Ministry of Agriculture & Farmers Welfare leh Ministry of DoNER lamin Kuva chin belh zawnga hmalak rawn remti chiah tawh lo mah se, kan sawrkar hi chuan a duh apiangte chintir zel kan la tum,” a ti bawk a. Nikum chhung khan Mamit District-a Kuhva tam enkawlna tur damdawi chu sawrkarin cheng nuai 33 man a pekchhuah thu a sawi bawk a ni.

Training cum Seminar on Scientific Method of Cultivation of Arecanut & Pest Management-ah hian LRS&WC Minister Lalthansanga pawhin thu a sawi a, LRS&WC Director Er. Vanlalmuanpuia Chhangte chuan Training an buatsaih chhan chu kum 2021 chho atanga Kuhva a rawn tam ve tak vang a nih thu sawiin, “Kuhva tam hi kan zirchiang tawh a, a natna leh a damdawi tur hi kan hmuchhuak tawh,” a ti bawk. He Training-ah hian kuhva chingtu mi 200 chuang telin science thiamna hmanga kuhva chin dan bakah kuhva ei chhe tu laka inven dan te zirtir an ni.