Bawrhsap in Priority Progress Partner te a fuih
Tunkar Ningani khan Serchhip DC Conference Hall-ah The Mizoram Bana Kaih (Hand holding) Scheme hnuaia Priority Progress Partner te tan training neih a ni a, he hun a hmanpuina ah Bawrhsap chuan ram hmasawnna tura sawrkarin thawhpui tura a thlan-chuah Priority Progress Partner te chu hlawhtling ngei tura tan la tura fuihin, “Sawrkar hmathlir leh in thil tum a inmil a, theihtawp in chhuah chuan sawrkar flagship programme a hlawhtling dawn a ni,” a ti a. Ruahmanna tha tak siamin sawrkarah mi tam takin dilna an thehlut a, uluk taka thuneitu ten an en dik hnuah hlawhtling thei tura beiseiawm te sawrkarin Progress Partner atan a thlang a; chuvangin, an vanneihzia inhria a loan an lak te tiriral mai mai loin, hlawhtlinpui ngei turin a chah bawk a ni.
The Mizoram Bana Kaih (Hand holding) Scheme hnuaia Serchhip District chhunga sawrkarin Priority Progress Partner mi 29 a thlan te tana Training buatsaih hi a vawi khatna niin Serchhip Addl. DC Lalrinzuala chuan a kaihruai a, a thlawna tanpuina dawng an ni lo tih inhre tur leh Hand Holding Scheme hnuaiah sawrkarin hmasawnna atana thawpuia a sawm te an ni tih in hre turin a fuih a. A ti tha ber leh hmahruaitu nih tum turin a chah a. He hunah hian Resource Person atan mi pali - Dr. C. Vanlalchhanhimi, SDC; Anne Lalhriatpuii, Accounts Officer DRDO; Ramnghahmawii, Branch Manager, SBI Serchhip Branch leh Judy Lallawmzuali, Branch Manager MRB Serchhip Branch ten thupui hrang hrang hmangin kalkhawmte an zirtir a ni.
He Training-a chhuak te hnenah hian Certificate hlan ngal a ni a, Serchhip SDO (Sadar) Rebecca Laldinmawii Hrahsel chuan lawmthu sawiin, a fuih bawk a ni.
Comments
Post a Comment