VC Term-a sawrkar khinna karleh ah ngaihtuah dawn

All Mizoram Village Council Association (AMVCA) in Village Council term pawh tawi chungchanga High Court-a sawrkar an khinna chu Thawhtanni lo awm tur, January ni 13-ah High Court in a ngaihtuah dawn.

AMVCA President K. Lalngaizuala chuan Akashvani palai zawhna chhangin VC term pawh tawi chungchanga sawrkar an khinna chu kumin a High Court hawn tan ni, Thawhtanni lo awm turah hian ngaihtuah nghal a nih dawn thu a sawi a. Inbuatsaih ngai te an inbuatsaih that thu leh an Association Member, Mizoram chhunga VC Member te pawh sawrkar khing tura an inlungrual that thu a sawi a ni.

Tarlan tawh angin AMVCA in Gauhati High Court, Aizawl Bench-a nikum December ni 6-a sawrkar khinna tur an thehluh chu sawrkar atanga VC term pawhtawina Order hmasa zawk, nikum November ni 20-a tihchhuah khinna tur a ni a. Sawrkarin Order dang, a tuk November ni 21-a a tihchhuahin order hmasa a luahlan avangin khin theih a ni lo a, Order hmasa khinna tur chu hnukdawkin Order hnuhnung zawk khinna, tuna an ngaihtuah tur hi an thehlut leh a ni. Rang taka ngaihtuah dil mahse Court chuan kum 2025-a High Court hawn hun, January ni 13 emaw ni 14-a ngaihtuah turin thu a lo dah tawh a ni. 

Village Council term kal lai tih tawi a nih thu hi Local Administration Department chuan thuchhuah siamin kumin February ni 19-ah a tawp dawn thu an lo puang tawh a. Sawrkarin Financial Year thar lo awm tura inthlan hautak tak pali awm tur tih zangkhaina tur leh sum renchem a duh avangin Village Council term kallai chu thla 6 in a pawt tawi tih LAD Minister C. Lal-sawivunga chuan a lo sawi tawh a ni. Hetihlai hian VC Inthlanna nei tur hian inbuatsaih mek zel niin Electoral Roll pawh ennawnin Final Roll chu tarchhuah a lo ni tawh bawk a ni.