Mizoram harsatna tawh te Minister in a tarlang

Transport Minister Vanlalhlana chuan Mizoram chu tlangram a nih avanga mihring phur leh bungraw phurhluh lamah harsatna an tawh thin thu a sawi.

Nimin-a 2nd Inland Waterway Development Council thutkhawm Kaziranga, Assam-a-a neih ah Transport Minister chuan he thu hi sawiin, Inland Water Transport changtlung tak hmangin heng harsatnate hi thui tak sutkian a nih theih tur thu a sawi a. Mizoram-ah lui lian, Inland Waterway kalpui theihna tam lo mahse a awmchhun te tangkai taka hman a nih chuan inkal-pawhna kawnga harsatna leh zin mite phurrit engemaw chen chhawk zangkhai a nih tur thu a sawi bawk.

Transport Minsiter Vanlalhlana chuan Mizoram-ah Inland Waterway Development hnuaia hmalak a nih chuan a ram leilung mi te hlawkpuina tura ruahmanna siam ngaih pawimawh nise a duh thu a sawi a. Inland Water Transport Subject hi Transport Department kutah kum 2019 khan dah tan chauh a nih thu tarlangin, Covid-19 avangin hmalakna chu engemaw chen ti khawtlai mahse a remchan dan ang angin bawhzui reng a nih thu a sawi a. Tuirial Dam chungchang pawh tarlangin, mihring leh bungrua phurh nan leh 2nd IWDC Meeting-in tihhmasawn leh tihchangtlun a tum em em, River Cruise Tourism kalpui theihna hmun pawimawh tak a nih thu a sawi a ni.

He Meeting-ah hian Inland Waterway Authority of India (IWAI) hmalaknate tarlan a ni a. State 21 leh UT tan cheng vbc. 1405.26 hu project hawnna neih a ni a, chung zingah chuan Mizoram-a IWT project kalpuina tur cheng Vbc. 12.1 a tel a. Quick Pontoon Opening Mechanism (QPOM) pahnih tlangzarh niin Central Database module leh Certificate hrang hrang – Vessel Registration Certificate leh a pek dan turte, Course Completion Certificate te hawnna neih a ni bawk.