Union Minister in Tlangnuam-a EMRS tlawhin siamthat ngai lai te siamtha turin a hriattir

Mizoram-a rawn zin Union Minister of State for Tribal Affairs Durga Das Uikey chuan nimin khan Tlangnuam-a Eklavya Model Residential School tlawhin a hmunhma te endikin thawktute a kawm bawk a, School Building leh Hostel sak tha tawklo chu pawi a tih thu sawiin, siam that ngai te siam tha tûrin Department hotu leh Contractor te a hriattîr nghal a ni.

Union Minister of State for Tribal Affairs Durga Das Uikey chuan India rampum ah hmasawnna inkhairual a awm a pawimawh thu sawiin, chumi tihlawhtling tur chuan zirna tihhmasawn a tul thu a sawi a. Eklavya Model Residential School (EMRS)-te chu zirna tihhmasawn nan mi tin banphak leh entawntlak a kalpui a pawimawh thu a sawi a ni. Union Minister Durga Das Uikey chuan zirtirtute chu naupang nun kaihruaitu pawimawh tak, nun kawng dik leh hlawhtlinna kawng kawhhmuh hna thawktu an nih angin khawvel hna zing a hna zahawm leh ropui ber pawla a ngaih thu a sawi a. Eklavya Model Residential School chu naupang tam takin zirna lam a hlawhtlinna an chharchhuahna hmun pawimawh tak a siam turin thawktute a chah bawk a ni.

Union Minister of State for Tribal Affairs Durga Das Uikey hian nimin tlai khan Hotel Regency-ah thuthar thehdarhtute kawmin School Building leh Hostel sak tha tawklo chu pawi a tih thu leh siam that ngai te siam tha tûrin Department hotu leh Contractor te a hriattîr nghal a. PM Modi-a’n Tribal naupang ten senso ngailo-a a thlawna zirna tha an hmuh theihna atana vaibelchhe tam tak senna tur ni mahse phal taka pêk a nih thu sawiin, Social Welfare Department thawktu leh Contractor te chu an fate awmna tur anga ngai a, tha taka thawh a tul thu a sawi a, Tribal naupang te guardian an nih anga hna thawk zêl tûrin a chah a, hna tha lo thawktu chu chunglam pawhin a ngaihdam theih a rinloh thu a sawi bawk a ni.

Thawktute tarlan danin Eklavya Model Residential School, Tlangnuam-ah hian zirlai 101 an awm mek a, chungte chu pawl 6 leh pawl 7 zirlai an ni a. Zirtirtu 6 bakah thawktu dang mi 11 an awm bawk. EMRS, Tlangnuam sak hna hi DJ Consultancy Services-in thawkin, hna za zela 95 hi thawk zo tawh anga chhut a ni a, March 2025 chhung a zawhfel hman beisei a nih thu tarlan a ni.

National Education Society for Tribal Students (NESTS), Ministry of Tribal Affairs kaltlang hian Sawleng, Khawbung, Khawzawl, West Phaileng, Thiltlang leh Lungsen-ah te EMRS sakna turin hma lak mek a ni a. Heng bakah hian Aibawk, Thingdawl, E.Lungdar, Reiek, Bunghmun, Sangau, Phullen, Champhai leh Bungtlang South-ah te sak belh a nih theih nan ruahmanna siam a nih thu tarlan a ni.