Thla hnih chhungin Reiek tlang tlawhtu an tam

Reiek tlang chu tunhnai thla hnih kalta, November leh December, 2024 chhungin tlawhtu mi 11,115 an awm a, hetihlai hian Reiek tlang panna a lirthei service rate chu ennawn zel theih tur a ni tih Reiek Tlang Tourism Development Board hotute chuan an sawi thung a ni.

Reiek tlang Tourism Development Board Chairman leh Reiek VCP ni bawk C. Lalrozama chuan kum 2024 November thla chhung khan Reiek tlang tlawhtu mi 5,083 an awm thu leh December-ah mi 6,032 an awm thu a sawi a, a kum telin Mizo mipui leh hnamdangte pawhin Reiek tlang an hlut deuh deuh nia an hriat thu a sawi.

Thudawnna in a sawi danin, Reiek tlang faina chungchang-ah hmasawnna a awm tih sawiin, tun hma lam te ngaihtuah chuan Reiek tlang tlawhtuten faina an ngai pawimawh nia an hriat thu a sawi. Hetihlai hian tlang tlawhtu an tam hrim hrim avangin bawlhlawh thehthang mai mai tawk erawh an la tam tho niin a sawi bawk.

Reiek Tlang Tourism Development Board ruahmanna angin Reiek tlang a bawlhlawh chharkhawmtu tur mi phanih rawih an ni a, chung mite chuan tlang a bawlhlawh awmte chhar khawmin, chung bawlhlawh te chu lirthei hmangin a paihna tur hmunah te an paih leh thin bawk a ni.

Tunhnai atanga Reiek tlang a lirthei service tir a nih chungchangah thudawnna chuan, kum upa leh hriselna tha tawk lo te, pianphunga rualbanlo, Reiek tlang a hmun ngei a hmu ve chak te an rilru-ah an awm ber tih sawi bawkin, a chuan man bithliah mek chu a tul dan ang zel a ennawn zel theih tur a nih thu a sawi a. Reiek tlang lawnna atana Motor hman dan leh hman man chungchang ah hian a to nia sawi awm avangin sawiselna a nasa hle niin a lang.