Mizoram-ah zirna In hrang hrang hawn tan leh a ni

Zonuna Kawlni /

Mizoram sawrkar hnuaia zirna In hrang hrang te chu Thlasik chawlh hman zawh a nih hnuah nimin khan hawn tan a ni leh ta.
 Thlasik chawlh (Winter Vacation) hnua kumin kumthar-a School kai tan ni ah hian Mizoram chhunga School tam zawk chuan Zirna In an hawng a. Kumthar atana School bul tan ni a nih angin School tam takah chuan inhlantharna hun an hmang a. Hei bakah hian zirlaite fuihtharna hun te, School inkaihhruaina hrang hrang inhrilh thar lehna hun atan hman a ni a. Board Exam hmachhawn tur leh Exam dang hmachhawn tur thenkhat chuan ngawrh takin Class an la tan bawk a. Sawrkar enkawl School ni lo zingah karleh lam atanga zirna In hawng tan tur thenkhat an awm bawk a ni.

School Education Minister Dr. Vanlalthlana chuan nimin-a kumthar atana School kal tan ni ah zirlai leh zirtirtute chu Mizoram tan theihtawp chhuah zel turin a sawm a. Minister chuan kum 2025-a School hawn tan ni ah Zirtirtute leh Zirlai zawng zawng chibai bukin, Kumtharah zirlaite chu hlawhtlinna chang theuh turin taihmak chhuah nasa lehzual turin a chah a. Zirtirtute pawh anmahni awmna theuhah taima taka hna thawk tura fuihin, Mizoram hmasawnna atan zirtirtute tluka pawimawh an awm lo tih a sawi a, ram tana theihtawp chhuah zel turin a chah a ni. 

Comments

Post a Comment

Popular News (Last 30 Days)

FG&CC Counsellor dahnghet

Zonuna Kawlni /
Image
Mizoram Synod in Serchhip-a Family Guidance & Counselling Centre (FG&CC) a kalpui meka Counsellor tura ruat Rev. Jonathan Pachuau dahnghehna hun chu nimin khan Serchhip Kawnpui Kohhran Committee Room No. 2-ah neih a ni a, FG&CC Director Rev. Lalthangpuia Fanai chuan Counsellor thar hi dahnghetin Rev. Zai-remkima chuan tawngtai sakna hun a hmang bawk a ni. Rev. Jonathan Pachuau hi Counselling ah term hnih a awm hnuin Biate Pastor Bial enkawl tura dah a ni a, tunah hian Serchhip-a FG&CC ah dah leh niin Rev. Rolungmuana Zadeng chu a thlak a ni.
Kimchang zawkin »