National Games-ah Mizo-ram in mi 81 tir dawn

Ramchhunga infiamna khawmpui lian ber, 38th National Games, 2025 chu January ni 28 atanga February ni 14 chhung khian Uttrakhand-ah neih a ni dawn a, Mizoram atangin Sports discipline 14 chu National Games khel tur hian tlingin infiammi 81 an tel thei tura ngaih a ni.

National Games-a Mizoram aiawha tel tur Sports Association hrang hranga Coach te chu Mizoram Olympic Association chuan kar kalta khan Sports & Youth Services Conference Hall-ah kokhawmin National Games inbuatsaihna hrang hrang sawiho a ni a. National Games 2025-ah hian Dehradun khawpuiah infiamna tam zawk chu nghah a ni dawn a. Infiamna hrang hrang 34 hmanga inelna neih tur a ni. Mizoram atanga National Games tel thei tur Sports discipline te hi - Wrestling, Football, Weightlifting, Wushu, Boxing, Cycling, Aquatic, Hockey, Judo, Archery leh Taekwondo te an ni a, Wild Card hmanga tel thei turte hi - Swiming, Shooting leh Athletics te an ni.

38th National Games, 2025 hi Mizoram atanga National Games-a tling an tam ber tum a ni a. Mizo infiammi langsar zingah Lalremsiami Hockey player chu Mizoram atanga tel thei tur langsar zingah a tel a. Medal beisei awm zingah Nazareth Lalthazuala, Wushu,  Taekwondo Poomse mipa Team leh Lalthlamuanpuia, Weightlifting ah Lalchhanhimi te chu an tel a ni.