MISTIC Governing Body thukhawm in an hmalakna hrang hrang an thlirho

Mizoram Science, Technology & Innovation Council Governing Body chu nimin khan an Chairman leh Chief Minister Lalduhoma hova thukhawmin an hmalakna hrang hrang an thlirho a, Patent Information Centre hnuaia an hmalakna te pawh he hunah hian tarlan a ni.

Mizoram Science, Technology & Innovation Council Governing Body thutkhawm hi CM Conference Hall-ah neih niin Er. H. Lalsawmliana, Chief Scientific Officer & Member Secretary, (MISTIC) chuan tunhnaia an hmasawnna leh hmachhawp an neih tlangpui a tarlang a, MISTIC hian Research & Development (R&D) hmalakna hnuaiah nikum khan Lunglei-ah Science Centre leh Planetarium an hawng a, Khawzawl-a KVK hmunah Ton 10 dah theihna Solar Cold Storage, Aizawl atanga control theih an bun a, 4-Color Web Offset Press pawh Phunchawng-ah hawn mai theihin an peih tawh a. Mizoram Biotechnology Centre, MINECO-ah sa mekin Selinga Food Testing Lab tihchangtlun hna an thawk bawk a. Heng bakah hian R&D hnuaia hmalakna dang engemaw zat an nei bawk a ni.

Patent Information Centre hnuaiah Intellectual Property Right; Patent 5, Trademark 20, Geographical Indications 5, Copyright 9 leh Design pakhat pawmsak (grant) an ni tawh a. Innovation Facility Centre hmalaknain Innovation (Thil thar chin chhuah) Promotion hmun engemaw zatah an kalpui a. Workshop te, Training leh Exhibition te, Innovator Meet te an buatsaih a. Innovators te an tanpui bakah intihsiakna te leh Industry tlawhna hun te pawh an buatsaih thin a ni.

Heng bakah hian Climate Change Knowledge Management hmalakna te, Technology Deployment te, Science lam chawilarna te, Institution leh Human capacity building lam hma-lakna te an kalpui bawk a. Nimin thutkhawm ah hian Mizoram State Intellectual Property Right Policy te, Science, Technology & Innovation Policy chungchang te leh an inrelbawlna thil pawimawh dang te a sawiho a ni.