Kolasib-ah Jansuraksha Campaign neih dan thlirlet

Nimin khan Kolasib District chhunga Jansuraksha Campaign neih chungchanga hmalak dan thlirletna neih a ni.

Kolasib DC Conference Hall-a District Level Consultative Committee Meeting on Campaign for Jan Suraksha Schemes at Gram Panchayat hi Kolasib DC Robert C. Lalhmangaiha chuan kaihruaiin District Level Consultative Committee (DLCC) te chu mipui rawngbawltu an nih angin Sawrkar-in mipuite tana hamthatna a ruahmante kawhhmuh leh hrilhfiah ngaite hrilhfiahtu an ni tih hrereng turin a chah a. DLCC Member te chu Bank leh Financial Institution lama a chinchang hretute an nih ang ngeiin mipuite zirtirna petu pawimawh tak an nih thu a sawi bawk.

Jan Suraksha Schemes Campaign hi Ministry of Finance hnuaiah awmin thla thum chhung; ni 15.10.2024 atanga ni 15.01.2025 chhunga neih tura ruahman a ni a. Hemi hian a tum ber chu tuna Social Security Scheme pahnih awm mek Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) te Enrollment tihpun leh Village Council/Gram Sabha tina Campaign neih a ni a. Heng an hmalakna leh an Mapping tih tawh te hi Jansuraksha Portal ah update thin a ni.

Kolasib District chhungah Jansuraksha Campaign hi District chhunga Bank hrang hrang 21 ten an kal pui mek a. PMJJBY hnuaia Campaign Target Achievement 865 chu 1232 in an khum tawh a. PMSBY hnuai Campaign Target Achievement 1006 awm chu 1385 in an khum thei bawk a ni. Tun dinhmunah Village Council 52-ah Jan Suraksha Campaign hi kalpui tawh niin, Campaign kalpuina tur Village Council 4 ah a la awm a. January ni 15.01.2025 hmaa Jan Suraksha Schemes Campaign hi Kolasib District-ah zawh hman tur in he thutkhawmah hian rel a ni bawk.