Damdawi In tha zingah East Lungdar PHC a tel

Mizoram-a sawrkar damdawi In pali (4) te chuan National Quality Assurance Standards (NQAS) an paltlang a, heng zingah hian Serchhip District atangin East Lungdar PHC chu an tel a ni.
National Health Mission, Health & Family Welfare Department atanga thudawn danin, India rama sawrkar damdawi In tha bik tehna, National Quality Assurance Standards (NQAS) paltlang zingah hian District Hospital pahnih – Siaha District Hospital leh Lawngtlai District Hospital bakah Primary Health Centre pahnih – East Lungdar PHC leh Phuaibuang PHC te an tel a. A hmain Aibawk PHC, Thingsulthliah PHC, Civil Hospital Aizawl, Civil Hospital Lunglei, Champhai District Hospital, ITI UPHC, Chawlhhmun UPHC, Haulawng PHC leh Sialhawk PHC te an lo tling tawh bawk a ni.

NQAS-a tling tur hian State Level leh National Level atangin tehna hrang hrang paltlang a ngai a; tehnaah hian Siaha District Hospital-in 92.53% hmiun, Lawngtlai District Hospital hian 88.08% an hmu a, East Lungdar PHC-in 89.29% hmuin Phuaibuang PHC-in 84.23% a hmu bawk a ni.

Siaha District Hospital hian damdawi In puma NQAS an hmuh bakah hian India rama nau neihna hmun tha bik leh inzaina hmun tha bik tehna, LaQshya certificate an hmu tel a, LaQshya bikah hian Platinum Certificate an dawng pha a. Hei bakah hian naupang damlo enkawlna hmun tha bik tehna, MusQan-ah an tling bawk a. Lawngtlai District Hospital pawh hian LaQshya Certificate an hmu tel bawk a ni.