Halpuah leh halmawi chah te pe lo turin hriattir

Serchhip District Bawrhsap chuan Halpuah leh halmawi chi hrang hrang bakah naupang silai lem a mu nei chi te Online hmanga chah te chu pechhuak lo turin Courier Service te a hriattir.
Hemi chungchanga thuchhuah a siamah Serchhip District Bawrhsap chuan Halpuah leh halmawite hian nasa takin mihring hriselna a tihchhiat thu leh boruak a tihchhiat leh tihbawlhhlawh mai bakah ri bengchheng a siam thu a tarlang a. Silai lem a mu nei chite pawhin mihring piansualna a thlen tak fo bakah tul lova sum khawhralna a ni bawk tih tarlangin, hetiang a nih avang hian September 24, 2024-ah Section 163 of Bhartiya Nagarik Suraksha Sanhita, 2023 hmangin halpuah, halmawi, Sky Lantern leh puakthei thil dang bakah silai lem a mu hmang chi reng reng lak luh, zawrh, hralh, hal leh hman khapna thupek tihchhuah a nih tawh thu a tarlang a.

Hetiang anih avang hian Serchhip District chhunga Online hmanga thilchah lo thlenna hmun Courier Service leh Dak-a thil thawn lo thlenna hmun Dak In (Post Office) te pawhin hetiang halpuah, halmawi, sky lantern leh puak thei thil dang bakah silai lem a mu hmang chi reng rengte Online hmanga chah alo thleng anih pawhin deliver lo turin a hriattir a ni. He thupek bawhchhia leh zawmlo te chu Section 223 of Bharatiya Nyaya Sanhita, 2023 hmangin kum khat lungin tan emaw Rs. 5,000/- chawi thlenga hrem theih a ni tih a hriattir nghal bawk.