ZPM leh HPC in Campaign Kick-off hun an hmang

Zoram People’s Movement Party (ZPM) leh Hmar People’s Convention (HPC) tangdun chuan Sinlung Hills Council General Election neih tur atan nimin khan Sakawrdai, Saiphai leh Suangpuilawn-ah te Campaign Kick Off hun an hmang a, Chief Minister Lalduhoma bakah Home Minister K. Sapdanga leh Supply Minister B. Lalchhanzova te an hmanpui a ni.

He hunah hian Chief Minister Lalduhoma chuan tuna Mizoram sawrkar chu mipuite nen tangrual a an din a nih thu sawiin, “SHC inthlan kan hmachhawn turah pawh hian HPC mipuite nen kan tang tlang leh dawn a ni a, a thlamuan thlak hlein ka hria,” a ti a. Sinlung Hills Council tan sawrkar hmasa in cheng nuai 150 a pek chu a beitham avangin nuai 190 an pek belh thu leh Lok Sabha MP in MP Fund atangin nuai 75 a pek tawh thu a sawi bawk.