Tlungvel-ah H1N1 hri leng

Tlungvel khua a tlang hrileng avanga Sample 43 an lak endik zingah mi 32 te chu H1N1 hri kai an ni tih hmuhchhuah a ni.

Health & Family Welfare hotute sawi danin Tlungvel khua-ah hian September ni 17 leh ni 28 inkar chhung khan hritlang khawsik leh khuh vei mi 245 chu Health & Wellness Centre-ah an inentir a. Hetiang a nih avang hian Tlungvel khua hi 'hri lenna khua' a puan a ni a. Thawh-tanni khan Thingsulthliah PHC-a Laboratory Technician chu tirin mi 43 sample a la a, hei hi ZMC-ah endik niin an zinga 32-te chu hritlang chi khat H1N1 kai an ni tih finfiah a ni.

H1N1 hi ‘Influenza 'A' Virus’ tiin an sawi a, sawi dan thenkhatah chuan 'Swine Flu' an ti bawk a. Hritlang kaite hi ngaihtuahawm leh na tak an awm lo a, mi 245 zinga a tam zawk hi dam tawhin mi 70 vel erawh chuan an hriltlang leh khuh a la dam chiang lo niin an sawi. Hemi hma Sept. 25 khan 'Chana Pawl' ti a sawite chenna Chhuanthar Tlangnuam khua-ah pawh hritlang khawsik a damlo hi mi 233 vel an awm a. An zinga mi 35-te sample endikna-ah an vai hian H1N1 hritlang natna an vei tih hmuhchhuah a ni tawh bawk.