Faina nunpui a tul thu Governor in a sawi

Governor Indra Sena Reddy Nallu chuan Faina chu kawng engkim ah nunpui a tul thu leh mimal, pawnlam leh chhungril nun bakah khawtlang huapa kalpui a tul thu a sawi.

UD&PA Department leh PHE Department tangkawp buatsaih Faina Ni, 'Swachhata Diwas' lawmna nimin a Assembly Annexe Conference Hall, Aizawl-a neih a hmanpuina ah Governor Indra Sena Reddy Nallu chuan kalkhawmte chu Swachhata Diwas pual chibai bukin, Prime Minister thahnemngaiha hnuaia rampum huapa faina kawnga hmalakna kalpui mek chu hetiang lam hawi khawvel pum huap hmalakna lian ber a nih thu a sawi a. Faina chu kawng engkimah nunpui a tul thu leh mimal, pawnlam leh chhungril nun bakah khawtlang huapa kalpui a tul thu sawiin, faina kawnga beihpui thlakna kum 10-na hmel hmuta Swach Bharat Mission chu kan zavaia tanrualna avang chauha hlawhtling a nih thu a sawi a. Faina kawnga hmalakna chuan India rama hmeichhiate dinhmun, hriselna leh nunphungte a chawikan nasat thu sawiin, faina chu tun mai nilo kan nitin nun leh tih danphungah kan lakluh a ngai tih a sawi a. Mizoram-ah khawpui leh thingtlang lamah nung tak maia Swachhata Hi Seva Campaign kalpui a ni leh mipuite'n hluta faina kawnga mi thahnem takte phur taka an penchhuak chu lawmawm a tih thu a sawi bawk.

Governor Indra Sena Reddy Nallu chuan Mizote'n faina an nunpui nia a hriat thu leh a tak ngeia a hmuh dante bakah faina hnatlangpui neih a ni thinte chu ropui a tih thu sawiin, India ram hmun dangte tana entawntlak nih tum zel turin Mizo mipuite a fuih a. Faina kawnga hmala tha Safai Mitra-te inpekna fakawm a tih thu sawiin, hmalakna chhuanawm tak chu chhawmnung zel turin a fuih a. Prime Minister-in India ram chu kum 2047-ah ram changkang Viksit Bharat a hlangkai tura tanlak a nih tur thu leh hemi tihlawhtling turin faina leh hrilselna chu peng pawimawh tak a nih thu a sawi bawk a ni.

He hunah hian Chief Secretary Dr. Renu Sharma IAS, Chairman, State Steering Committee, Swachhata Hi Seva 2024 chuan faina kawnga Line Department pawimawh tak pahnih UD&PA leh PHE Department hnuaia thawktu zawng zawngte hmalakna chhuanawm a tih thu a sawi a. Faina kawnga District tina hmalatu DC kaihhruai District Steering Committee-te hmalakna chhuanawm a tih thu sawiin, khawpui leh thingtlang lama faina kawnga hmalakna ah khawtlang mipuite phur taka an tel thin chu ropui a tih thu a sawi a. Fai tura hmalakna chu Department nilo, kan zavai tanrualna tur zawk a nih thu a sawi bawk a. Kumin faina beihpui thlak chhungin programme hrang hrang 500 dawn buatsaih a nih thu leh mi 10,000 chuang an tel thu a tarlang bawk.