Ruihhlo ngai tam in nawhchizawrhna a ti hluar niin sawi

Social Welfare Minister Lalrinpuii chuan Mizo hmeichhe zingah ruihhlo ngai tam zel chuan nawhchizawrhna a ti hluar tih sawiin, ruihhlo do kawngah mitin tanrual a ngai tih a sawi.

Mizorama ruihhlo do kawnga hmeichhiate tihchak lehzual dan tur inzirtirna ‘Awareness programme on Empowering Women Combating Substance Abuse in Mizoram’ tih nimin-a I&PR Conference Hall, Aizawl-a buatsaih a hmanpuina ah he thu hi sawiin Social Welfare Minister chuan Mizoram chu Bangladesh leh Myanmar ramri-a awm a nih avangin ruihhlo a hluar phah niin a sawi a, heng avang hian nasa zawka do a ngai tih sawiin, hmeichhe zingah ruihhlo ngai an tam zel chu pawi a tih thu leh mi tin tangruala chhungkua atanga ruihhlo do bultan turin a chah a ni.

Nimin-a inzirtirna hunah hian sawm bik mithiamte hnen atangin ruihhlo ngai hmeichhiate leh a enkawlna kawnga mawhphurtute tana hriat tur pawimawh ngaihthlak a ni bawk.