Tourism Minister Conference ah Mizoram mamawh thlen

North Eastern & Eastern States/Union Territories Tourism Ministers Conference chu niminpiah khan Shillong-a Vivanta-ah neih niin Union Minister for Culture & Tourism Gajendra Singh Sekhawat leh Union Minister of State for Tourism Suresh Gopi te chuan an kaihruai a ni.

He hunah hian Mizoram atangin Tourism Minister Lalrinpuii pawh telin North East State-te Tourism-a hma kan sawn ve theih nan a bik taka ngaihtuah kan ngaih thu Sawrkar laipui hotute hnenah a thlen a. North East khawpuite inkalpawhna tha tak hmanga thlunzawm leh khualhip thei hmunhma tlawh tur neihte tihhmasawn a tulzia sawiin, Sawrkar laipui chu ruahmanna fel tak ngaihtuah sak turin a ngen a. Mizoram-a Community Based Tourism kalpui tum dan tlangpuite tarlangin, thing leh mau, ram leilung hausakna leh mawina bakah hnam ziarang te vawnghim chungin thalaite tana subsidy tha tak tak kengtel Entrepreneurship Development Policy leh Programme-te ruahman sak turin a ngen a ni.

Tourism Minister Lalrinpuii chuan he huna tel Khualliante leh Tourism Minister-te chu Mizorama rawn zin tur leh Mizoram mawina leh khualzinte chunga kan thatnate, kan hnam nunzia leh tihdante rawn hmu ve tura sawmin, indaidanna te thiata North East-ah Tourism hmanga danglamna thlen tum theuh turin a sawm nghal bawk.