Mizoram-a Grape tui sawrna ah Grape rah lei mek

Champhai District-a Tlangsam leh Hnahlan khua a Grape tuisawrna (Winery)-ah tunlai hian Grape rah lei mek niin an lei khawl ang ang te sawr nghal zel a ni.

Member 133 awmna Champhai Grape Growers Society chuan kumin July ni 9 atang khan Grape rah an lei tan a, tun thleng hian quintal 1,202 vel lei tawhin kum dangah chuan an Member ta ni lo pawh an lei laiin kuminah chuan an member ni lo te Grape rah lei sak tur an awm meuh lo. Kum kalta khan Grape rah quintal 1,069.6 lei khawlin kg khat Rs. 60 hisap in an la a, Grape rah an lak te hi an lak ni la la-in an sawr nghal tlangpui a ni.

Champhai Grape Growers Society hruaitute chuan kum kalta a Grape an lak a tui an sawr sa te chu pakhat mah dehral a la ni lova, Grape tui sawr sa litre nuai khat vel an la kawl mek a. Baptist Church of Mizoram in Sakrament atana an lei sak erawh Inremna thuthlung awmsa angin hralhchhuah a ni a, anni hian kum khatah case 200 vel an lak sak thin a ni. Champhai Tlangsam-a Winery atang hian Champwine ml. 750 leh ml. 375 siam a ni a, Champwine Premium hi ml. 750 siam niin Sacramental Wine hi ml. 750 siam a ni bawk a. Vendor te kaltlangin heng Wine te hi hralh a ni a, hetihlai hian Sawrkar atanga phalna (Licence) nei ve si lo, mimal wine chi hrang hrang siamchhuak ve an awm nual avangin Champhai Winery atanga siam chhuah Wine te hi Vendor ten an hralh chak loh phah niin Grape chingtu pawl hruaitute chuan an sawi a ni.

Hnahlan Winery-ah pawh kumin July ni 17 atang khan loneitute tharchhuah Grape rah lei a ni a, kg. khat Rs. 60 zel hisapa leiin quintal 830 vel leikhawl a ni tawh a. An lei ang angte chu a tahtawla sawr nghal zel a ni bawk. Member 200 vel awmna Hnahlan Grape Grower Society hian Winery atanga an siamchhuah Isabella an tih chu Vendor-te kaltlang chauhin an hralhchhuak mek a, hetihlai vek hian kum kalta lama Grape tui an sawr sa litre sing 4 vel hralhchhuah loh an la nei mek bawk a, Vendor te chauh kaltlang lova zalen taka hralhchhuah theih an duh thu an sawi a ni.