PMMSY hnuaia Sangha Dil siamna dawng tur thlang

Niminpiah khan District Level Committee on Pradhan Mantri Matsya Sampada Yojana-Centrally Sponsored Scheme (PMMSY-CSS) chu Serchhip-ah thukhawmin kum 2023-2024 chhunga he Scheme hnuaia Sangha Dil thar siam tanpui dilna lut te an thlirho.
District Level Committee on PMMSY-CSS thutkhawm Serchhip DC Meeting Room-a neih hi an Chairman leh Bawrhsap, Paul L. Khuma chuan kaihruaiin he Scheme hi hlawhtling taka kalpui a nih theih nan thutkhawm a tel te chu ngaituahna uluk taka seng tur leh a mamawh leh a dawng awm ten tanpuina an dawn theih nan theihtawp chhuah a tul thu a sawi a, tanpuina dawngtute hmalak dan enfiahna pawh uluk taka neih a pawimawh thu a sawi bawk. Serchhip DFDO leh Member Secretary Lal-hmunsanga chuan PMMSY inkaihhruaina tlangpui leh he ruahmanna hnuaia tanpuina pek theih dan te he huna tel te chu a hrilhfiah bawk a ni.

Kum 2023-2024 ah hian Serchhip District hian PMMSY hnuaiah Hectare 10-a zau-a Sangha Dil thar siamna turin tanpuina pek tur a nei a, diltu mi 576 awmin heng atang hian tanpuina pek tur mi 50 thlanchhuah an ni a, tanpuina dawngtu mi pakhat zel hian Hectare 0.2 a zau Sangha Dil thar an siam dawn a, he ruahmanna hnuaiah Sangha Dil awmsa cheibawl leh siamthatna turin tanpuina pek tur a awm lo thung a ni.