Kuthnathawktute an din chhuah theihna'n sawrkar in nasa takin ngaihtuahna a seng - Agriculture Minister

Agriculture Minister PC. Vanlalruata chuan kuthnathawktute an dinchhuah theihna'n sawrkarin nasa takin ngaihtuahna a seng tih a sawi.

Tuivawl kam Bualphung zau-a ‘Maite lo zawh runpui’ nimin-a neih a hmanpuina ah Agriculture Minister PC. Vanlalruata chuan kuthnathawktute an dinchhuah theihna'n sawrkarin nasa takin ngaihtuahna a seng tih hi sawiin, Thlai chi li- Aieng, Sawhthing, Hmunphiah leh Hmarcha-ah te bul tan tawhin, thlai dangah pawh hmalak tum zel a ni tih a sawi a. Kuthnathawktu te'n phur taka hna an thawh theih nan thlai man bituk sa neih chu a tul tih a sawi bawk.

He hunah hian bialtu MLA leh Horticulture Minister Prof. Lalnilawma pawhin Maite Lozawh runpui an hmang thei chu lawmawm a tih thu a sawi a. Maite khua chu Sawhthing hmun tha tak a ni tih sawiin, sawrkarin Sawhthing chingtute tan theihtawp a chhuah mek zel thu leh Sawhthing chu sawrkarin Rs. 50 aia tlawm lo turin a man bituk tawh a, hei hian kuthnathawktute a khaichhuah theih a beisei thu a sawi bawk.

Nimin-a Lozawh runpui hi Lalbiakenga Lo-ah neih niin Maite khuaa ZPM party mi leh sa ten he hun hi an buatsaih a ni.