IASE hnuaia zirlai hlawhtlingte chawimawina hun hmang

Aizawl Republic Veng-a Institute of Advanced Studies in Education (IASE) chuan nimin khan M.Ed leh B.Ed zir chhuak zirlai tithate chawimawina hun hmangin LAD Minister C. Lalsawivunga chuan he hun hi a hmanpui a ni.

IASE Auditorium-a he hun hmanna ah hian LAD Minister chuan zirna chu ram leh hnam hmasawnna bul a nih zia leh, a phena thiamna tak tak neih a pawimawh thu sawiin, zirlaite chu chhawr tlak thiamna zirchhuak ngei turin a chah a. Tunlai khawvelah chuan zirchhuah satliah mai chu a tawk tawh loh thu leh chumi atan chuan inchher hriam zel turin a chah bawk a. Rinawmna vawng nung zel turte leh Pathian tihna nen ram leh hnam hmasawnna atana an thiamna leh finnate hmang turin a fuih bawk.

Tun dinhmunah IASE-ah hian B.Ed zirlai mi 300, M.Ed zirlai mi 60 leh Ph.D zirlai mi 36 an awm mek a. Kumtin mi 150 velin B.Ed hi an pass thin bakah M.Ed pass chhuak mi 40 vel an awm ziah bawk a. Kumin-a University Exam result chhuakah khan IASE-a zirlaite hian result tha tak neiin M.Ed-ah 100% pass-in B.Ed-ah 99.2% an pass a, pass chhuakte zingah University Top 10 leh Rank holder engemawzat awmin, M.Ed leh B.Ed Topper-te hi IASE zirlaite an ni nghe nghe a ni.

Nimin-a he hun hman ah hian LAD Minister hian zirlai tithate chawimawina thilpek a hlan bakah IASE Annual Magazine 2024 ‘Vartian’ chu a tlangzarh nghal a, he hun hi Dr. Zairemmawia Renthlei, Dean, Student's Welfare Committee, IASE chuan a kaihruai a ni.