Vawk thi zingah Serchhip Town chhunga thi a tam

Serchhip District-ah nimin khan African Swine Fever (ASF) vanga Vawk thi 17 chhinchhiah belh leh a ni.
Serchhip District-a ASF vanga Vawk thi chhinchhiah thar 17 zinga 12 te hi Serchhip Town chhunga mi te niin New Serchhip South leh Chanmari Veng-ah Vawk pathum ve ve thiin New Serchhip North Chhiahtlang-ah pahnih ve ve a thi bawk a, Serchhip Vengchung leh Dinthar Veng-ah Vawk pakhat ve ve a thi bawk. Heng bakah hian East Lungdar-ah Vawk thi 3 awmin North Vanlaiphai leh Leng-ah Vawk pakhat ve ve a thi bawk a ni.

Nimin khan Serchhip District-a Veng leh khua 10-ah Vawk 64 suat leh a ni bawk a, Leng khua ah Vawk 23 suat niin New Serchhip South-ah 10, New Serchhip North leh Chhuan-thar Tlangnuam-ah 9 ve ve suat niin heng te hi nimin a Vawk suat tam zualna an ni.

Heti hian nimin thleng khan Serchhip District-a Veng leh khua 30-ah kumin chhungin ASF vang hian Vawk 2099 a thi tawh a, Vawk 5353 suat ni tawh bawkin Vawk hri leng hian ziaawm lam a pan ve hret hret niin a ngaih theih a, Vawk hri leng hi chhungkaw 1475 zetin an tuar tawh thung a ni.

Mizoram chhungah kumin kumtir atanga nimin thleng khan ASF vanga Vawk thi 9169 awm tawhin vawk 17,016 suat a ni tawh bawk a, Khua leh Veng 203 in he htri hi an tuar tawh bawk a ni.