Serchhip District-a Nasha Mukt Bharat kalpui tur thlirho
Sawrkar laipui Ministry of Social Justice and Empowerment hmalakna hnuaia kalpui Nasha Mukt Bharat chungchang sawihona Serchhip DC Meeting Hall-a neih ah hian Bawrhsap Paul L. Khuma chuan ruihhlo leh ruihtheihthil laka fihlim lo thlalai te chu tute nge an nih tih zirchian leh hriatchian a tul thu leh, heng miten an thiltih thalo an bansan theihna tura tanpui chu thil pawimawh hmasa nia a hriat thu a sawi a. Serchhip District chhungah ruihhlo laka thalai te an fihlim theihna turin Nasha Mukt Bharat kengkawhtu tur zawng zawng - Sawrkar Department te, zirna In te leh tlawmngai pawl te chu tan la thar turin a sawm bawk a ni.
He thutkhawm-a tel te hian Serchhip District chhunga hmalak dan tur ruahmanna, Action Plan siamin enho tura thutkhawm leh nise an ti a. Nasha Mukt Bharat Abhiyan-in inkaihhruaina a siam ang zul zuiin School leh College a Campaign neih dan tur te, a zau thei ang bera ruihhlo thatloh zia inzirtirna kalpui dan tur te sawiho in, Inzirtirna kengkawhtu tur inruat a ngaih avangin District Education Officer chuan Master Volunteer tur mi 50 lo rawt se an ti a ni.
Nasha Mukt Bharat hi District tinah kalpui niin thalai te - a bik takin School leh College zirlai te zingah ruihhlo thatloh zia inzirtir a, a la ti ngai lo te an fihlim theih nan leh a lo ching dawklak tawh te pawhin an sim theihna tura tanlak chu a thil tum pawimawh ber te zinga mi a ni a. Zirlaite leh zirtirtute zingah programme buatsaih a, Club din tur te; ruihtheihthil ti thin zirlai te a tul anga Hospital leh Rehab Centre a inenkawl tura hruai te, heng Centre leh Counselling an pek thinna hmun vil zui (monitor) te, tlawmngai pawl te leh khawtlang te nena tangho a ruihhlo do dan ngaihtuah te chu a thil tum zinga langsar zual a ni.