Thlai thar hralh leh sawngbawlna hmun atan enfiah

Assembly Speaker Lalbiakzama leh Adviser to Chief Minister (Implementation of Hand Holding Policy) Dr. K.C. Lalmalsawmzauva te chuan nimin khan Sairang Horticulture Centre leh Zoram Mega Food Park Pvt. Ltd., Khamrang te tlawhin hman tangkai dan tur an enfiah.

Heng sawrkar mi pawimawh pahnih ten Sairang Horticulture Centre an tlawhnaah hian Aizawl DHO C. Zosangliana leh a thawhpui te'n lo dawng-sawngin Zoram Mega Food Park Pvt. Ltd. ah hian Director Lalrinmawia Tochhawng leh a thawhpui te'n lo dawngsawng bawk a. Heng hmun te hi thlai ei chi Sawrkarin a hralhna a buaipui turte lei khawlna tur hmun, a dahthatna, sawngbawlna leh hralhchhuahna tur hmun atan hman tangkai dan tur leh a remchan dan te an enfiah bakah an sawiho nghal a; Department hotute chuan an harsatna leh hmalak tul angte lo thlenin sawrkar hmalakna chu a theih ang anga tawiawm an inhuam thu an sawi a. Speaker leh Adviser to CM (Implementation of Hand Holding Policy) te chuan sawrkar a hmanhmawh tawh avangin thlai lei tur, a bik takin Sawhthing thar hma ngeia hmunhma siamthat ngai tih a sawi bawk.

Speaker Lalbiakzama chuan kuthnathawktu te thlai leh thei tharchhuahte lo dawnsawn leh a dehral kawngah sawrkar chu theihtawpin a in buatsaih chho zel tih sawiin, “Thlai thar a nihna ang anga hralh chhawn vek rem lote sawngbawl (process) dan kawngte a awm em tih zir mek zel a ni a, chutiang tur chuan sawrkar hmunhma awm sa Sairang Horticulture Centre leh Zoram Mega Food Park Pvt. Ltd., Khamrang te hi tangkai taka hman theih dan kawng zawn a tul hle a ni,” tiin Adviser to CM pawhin Hand Holding Policy hnuaia hmalakna tur zingah kan mamawh hmasa ber, kan thlai tharte hlawk taka sum-a chantir chu thil tul hmasa ber a nih thu a sawi bawk.