MNF in Aizawl-ah Remna Ni an hmang

MNF party chuan nimin khan ‘Remna ni’ an hmang a, an party President Zoramthanga chuan, “Remna ah hian tumah ralbang bik awm lovin, kan zavaiin kan tel,” a ti.

Aizawl Mizo Hnam Run-a Remna ni lawmna ah hian MNF President Zoramthanga chuan Remna-ah hian India ram aiawhin Union Home Secretary, R.D. Pradhan leh Zoram mipui zawng zawng aiawhin Chief Secretary Lalkhama bakah Ramhnuai leh Ram chhunga MNF zawng zawngte aiawhin Laldenga ten an hming an ziak tih sawiin, “He remna ah hian tumah ralbang bik awm lovin kan zavaiin kan tel a, a humhim pawh kan zavaia mawhphurhna a ni,” a ti a. “Remna nei tura kil tin atanga palai lokal Kohhran mi, zirlai pawl leh mi chi hrang hrang thahnemngai ten ‘In inrem theihna ang ang kan pawm ang’ tiin, remna an duhzia an sawi thin,” tiin, “Inremna kalkawngah thil tam tak a thleng a, Bangladesh hial te pawh a piang a ni. Harsatna tam tak kan tawh kha tuna remna tura Pathian remruat alo ni zel a ni. He remna hi India emaw, Mizo mipui duhthusam a ni lova, kan pawmtlan theih tura duan a niin, sign hnan a ni,” a ti bawk.