Serchhip Mat Phai-a Thlai chingtute chuan kum kalta chhung khan an thlai thar chi hrang hrang an hralhna atangin cheng nuai 370 vel an leichhuak niin an sawi a. Kuthnathawktute lam hawi sawrkar kan neih avangin beiseina sang tak an neih thu an sawi bawk.
Serchhip Mat Phai-a Thlai chingtute intelkhawmna, Serchhip Agriculture & Horticulture Cooperative Society Limited hian nimin khan Serchhip Darnam Village Council Hall-ah General Assembly vawi 12-na hmangin he hun hi an President Lalramthara chuan a kaihruai a, he hunah hian Report hrang hrang ngaihthlak niin kum kalta ah khan an thlai thar chi hrang hrang hralhna atangin cheng nuai 370 vel an lei thu tarlan a ni a, an thlai thar zingah Zikhlum chu quintal 10,000 vel tharin Bakbawn quintal 8000 vel an thar bawk a, heng bakah hian thlai chi dang dang pawh an tharchhuah thu tarlan a ni bawk.
Serchhip Agriculture & Horticulture Cooperative Society Limited General Assembly hian chawhnu lamah Rorelna hun hmangin Mizoram in Kuthnathawktute lam hawi sawkar kan neih avangin beiseina sang tak an neih thu sawiin, sawrkar in hma a lak sakna hrang hrangte chu lawmawm an tih thu an sawi a. Serchhip Mat Phai-a Thlai chingtu ten Fur-ah pawh an thlai thar te tha taka an phurh kai theih nan Mat Kai hnihna chu Fur-ah pawh Motor kal theihna a siam a nih theih nan thuneitute hnenah ngen nise tiin Chawm Kai atanga Thinglubul kawng siam mek ah FOCUS hmalakna in a huam ve loh Tuisen leh Vaivenga Zau atanga he kawng pawhtute pawh a theih anga PCC-a siam a nih ve theih nana hmalak nise an ti a. An Member te tan Society hminga ‘Best Farmer Award’ siam nise an tih bakah Zikhlum chi tha hnianghnar zawka an hmuh theih nan sawrkar ah hmalak nise an ti a, Mat Phai-a Electric Current la thlen lohna ah a thlen theih nan hmalak nise an ti bawk.
Serchhip Agriculture & Horticulture Cooperative Society Limited-ah hian Serchhip Mat Phai-a thlai chingtute telin tunah hian Member 200 vel an awm mek a, nimin-a Assembly-ah hian mi 120 vel an tel a ni.
Comments
Post a Comment