Serchhip-ah State Level Science Competition nei

Nimin khan Mizoram District hrang hrangah ‘2nd State Level Science Competition’ neih a ni a, District hrang hranga tithate atang hian State Level Ranking siam leh tur a ni ang.

Science Teachers Association Mizoram (STAM) leh Mizoram Science Technology & Innovation Council (MISTIC) tangkawp buatsaih ‘2nd State Level Science Competition’ hi Serchhip-ah chuan Govt. H/S Serchhip-ah neih niin Serchhip District chhunga Class-VIII huang ah zirlai 29 leh Class-X huang ah zirlai 56, an vaiin zirlai 85 an tel a. Serchhip District-ah chuan Class-VIII ah PC. Zothansanga (PES Serchhip) chu pakhatna niin Joel VL. Hmangaihzuala (PES Serchhip) leh C. Lalrammuana (Govt. Chhiahtlang M/S) chu pahnihna a ni a, Hilda Vanlalhlimpuii (LFCS) chu pathumna a ni bawk.

Class-X Zirlaite tana inelna ah Stephanie Lalchawimawii chu pakhatna niin Genevieve Lalhminghlui chu pahnihna a ni a, Zonuntluangi leh Lalremsanga chu pathumna niin an vai hian Marian H/S Serchhip-a zirlaite vek an ni a. He intihsiakna a tel Mizoram hmun hrang hranga mi te hian Science Subject-a zawhna inang vek an chhang a, District hrang hranga Top 3-a lang te hi an mark hmuh theuh Aizawl-ah lakhawmin hemi atang hian State Level-a Top 3 thlanchhuah leh an ni dawn a ni.

2nd State Level Science Competition ah hian Mizoram pumah Class VIII zirlai 720 leh Class X zirlai 1000, an vaiin 1720 an tel a, Science Teachers Association Mizoram (STAM) he intihsiakna zirlai ten an hlut chu lawmawm an tih thu sawiin, Zirlaite hian an hlawkpui ngei an beisei thu an sawi bawk.