Mizoram Lok Sabha MP Inthlanpui neih ah Richard Vanlalhmangaiha hneh taka thlantlin a ni

Mizoram in Lok Sabha Seat khat a neih luahtu tur thlanga Inthlanpui neiha Vote tla te chu nimin khan chhiar niin ZPM Candidate Richard Vanlalhmangaiha chu hneh taka thlantlin a ni a. Political Party hrang hrangte pawhin Lok Sabha MP thar chu an lawmpui thu an sawi bawk a ni.

Kumin April 19-a Mizoram Lok Sabha Inthlanpui-a Vote tla te chu nimin khan Mizoram District hrang hrangah tluang taka chhiar a ni a, he inthlanna chuhtu mi 6 zingah ZPM Candidate Richard Vanlalhmangaiha chuan Vote 2,08,552 hmuin thlantlin a ni a, amah hnaih bertu MNF Candidate K.Vanlalvena'n vote 1,40,264 hmuin an inthlauhna hi Vote 68,288 zet a ni a. Congress Candidate Lalbiakzama'n vote 98,595 a hmu a, BJP Candidate Vanlalhmuaka'n Vote 33,533 hmuin MPC Candidate Rita Malsawmi'n vote 3793 a hmu a, Independent Candidate Lalhriatrenga Chhangte chuan vote 4706 a hmuh bakah NOTA-ah Vote 1893 a tla a ni. ZPM Party Candidate Richard Vanlalhmangaiha hian Assembly bial 37-ah hnehna a chang a, MNF Party Candidate chu Thorang bial-ah chakin BJP Candidate pawh Palak leh Tuichawng Bial-ah a chak bawk.

Mizoram Lok Sabha MP atana thlan thar Richard Vanlalhmangaiha hian nimin khan Aizawl-a ZPM party Office-a lawmthu sawina hunah, “Vawiin-a kan hlawhtlinna hi ka mimal hlawhtlinna a ni lova, ZPM Party bil hlawhtlinna pawh ni lovin, he ram mipui, ka thawhsak turte tana hlawhtlinna a ni,” tiin, “Kan CM kaihruainain hna kan thawk chho dawn a, ka phur tawh takzet a, min beisei angin ka theihna sang ber ka chhuah dawn a ni,” a ti a. Hnehna an chan theihna tura theihtawp chhuahtu zawng zawng chungah lawmthu a sawi bawk.

ZPM Leader leh Chief Minister Lalduhoma pawhin Pathian hnenah lawmthu sawiin, “Hnehna sang tak min petu Pathian leh mipuite chungah kan lawm takzet a ni,” a ti a. “Pathian in min thlah-thlam lova, he party hian Pathian lung a tih awi zel chuan hnehna kan chang zel ang tih ka ring a, Pathian in a hmanrua atan min la hmang zel a ni,” a ti a. MP inthlan result hian Party tinte dinhmun a pholang chiang hle-a a hriat thu sawiin, “ZPM Party hmasawnna ropui tak pawh hmuh theihin a lang a, MLA Bial 40-a bial 37 laiah hnehna kan chang ta hi lawmawm kan ti hle,”a ti bawk.

MNF Party chuan nimin khan thuchhuah siamin ZPM Candidate Richard Valalhmangaiha thlantlin a ni chu an lawmpui thu leh a kalzelna turah Mizoram, hnam leh kan Sakhaw humhim nana chak taka thawk tur leh theihtawp chhuaha hna thawk turin duhsakna an hlan tih an tarlang a. MNF in an chhawpchhuah, Zoram mipui Candidate K. Vanlalvena a tlingzo ta lo chu pawi an tih thu leh duhsak taka thlangtu zawng zawngte chungah lawmthu an sawi bawk.

MPCC President Lal Thanzara pawhin MP atana thlan thar Richard Vanlalhmangaiha chu thinlung taka a lawmpui thu thawnin, Parliament-a Mizoram aiawh tura thlantlin a nih ang ngeiin Pathian venna leh kaihhruaina hnuaiah a mawhphurhna leh tihtur te tha taka a hlen ngei theih nan duhsakna a hlan a. Inthlanpui atana theihtawp chhuahtu an party mipuite chungah lawmthu a sawi bawk.

BJP pawhin nimin khan Aizawl-a an Party Office-ah Inkhawm neiin he hunah hian an President Vanlalhmuaka chuan Mizoram aiawh tura MP-a thlantlin Richard Vanlal-hmangaiha chu a lawmpui thu a sawi a, “Mizoram tan Malsawmna a nih ngei kan beisei a, BJP Official candidate ka nih anga in Vote hlutak min petu te in zavai a chungah lawmthu ka sawi tak meuh meuh a ni,” a ti bawk.

PC Party pawhin nimin khan thuchhuah siamin an Official Candidate Rita Malsawmi Vote tute chungah lawmthu sawiin, MP atana thlantlin tak ZPM Candidate Richard Vanlalhmangaiha chu an lawmpui thu an tarlang bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man