Tunhnaia Thli, ruah leh Rial thawk avangin Mizoram-ah chenna In chhe vek 335 a awm

March 31, 2024 leh April 2, 2024 inkar chhunga Mizoram chhunga Ruah, Thli leh Rial thawk avang khan In chhe vek 335 awmin In chhe nasa lo 2311 a awm a, mihring thi pakhat a awm bawk.
Mizoram sawrkar-a Disaster Management & Rehabilitation Department chhinchhiahna atanga a lan danin March 31, 2024 leh April 2, 2024 chhung ruah, thli leh rial thawk khan Mizoram hmarlam ah chhiatna a thlen nasa zual a, District hrang hrang atanga State Emergency Operation Centre(SEOC) Aizawl in report an dawn chinah In chhe vek (Fully/Severely damage) 335 awmin In chhe nual (Partially damage) 2311 a awm bawk a, Aizawl District-ah thi mi pakhat awmin ran thi pakhat a awm bawk a ni.

Sawrkar thuchhuah in a tarlan danin chhiatna lo thleng te avang hian Mizoram sawrkar leh a kaihhnawih Department te chuan rang taka hma la in ngaihven nghal a ni a, District ti a DC/DDMA te chuan an District theuh ah SDRF (Response & Relief/recovery & Reconstruction) Fund an kawl sa theuh atangin Emergency-in a theih ang angin chhiatna tawk te hnenah tanpuina an pe mek zel a, chhiatna tuarte chhawmdawlna atan SDRF Fund atanga emergency a rangva leh silpauline lei nghal tura tih a nih angin Order siam nghal a nih bakah Rangva engemaw zat a lo thleng tawh a, rangva leh silpauline dang te pawh lo thleng thuai tur a beisei a ni.

Hei bakah hian SDRF Fund pawh emergency-a dil belh nghal niin niminpiah khan Finance Department atang pawhin engemaw zat hmuh nghal a ni tih sawrkar thuchhuah chuan a tarlang a, nimin khan District zawng zawng DC/DDMA ah an mamawh zual phuhruk ngei theih turin pek (release) nghal vek theih beisei a nih thu an tarlang bawk.