Serchhip District-ah thli tlehin In engemaw zat tichhiain Pavalai Intawhkhawmna tur Pandal a chhe vek
Nimin zing dar 9:30 vel khan thlipui na tak leh ruah thawkin Mizoram hmun hrang hrang nuaiin Serchhip District-ah pawh chhiatna thleng a awm nual a, Khawlailung Dinthar Veng-a Nunmawii te In chu thli tleh hian a chung hawk vekin luahzui tlak lohin a chhia a, In chhung thlawk hian an thenawm te In bang (Tile) leh Tuizem thenkhat a tichhe bawk a ni. Chekawn khuaah pawh VL. Chhanhimna te In chu thli hian a chung hawk vekin luahzui tlak lohin a chhia a, Vawiin hian khawtlang in hnatlang in a thawmthat hna an thawk ang.
Nimin zing-a thli tleh hian tun thla ni 12 atanga 14 chhunga Zoram pum huap Kohhran Pavalai pawl Intawhkhawmna E. Lungdar Tlang-a neihna tura Pandal sak chu a tichhe vek bawk a, East Lungdar VCP K. Lalngaizuala hnen atanga LENKAWL in thu a dawn danin Pavalai Pawl Intawhkhawmna atana Pandal hi hna za zela 98 vel zawhfel ni tawhin nimin zing-a thli tleh khan a tichhe vek a ni. Nimin tlai khan Organising Committee chuan thutkhawm hmanhmawh nei nghalin Synod lam hotute nen inbiakna neiin a hun pawh sawn a remchan thu sawi mah se Pathian rinchhan chunga a hun ngaia nei tura inbuat-saihna kalpui nise an ti a, Vawiin atang hian a khaw nawt-a hnatlang neiin Pandal chhia senghawi hna hi thawh a ni anga, Pandal Structure an hman chu hman vek theih ni tawh lo mah se a theih ang ang hmanga thingtuai leh thildang te nen tangtlangin Pandal sak hna hi thawh leh nghal nise an ti a ni.
Nimin-a thli tleh khan Baktawng-ah pawh In 10 vel tichhia in Chhiahtlang-ah In 5 vel a chhe bawk a, heng bakah hian In chhe nasa lutuk lo engemaw zat awmin khaw 13 atangin In chhia a awm thu report dawn a ni tawh a ni.
Comments
Post a Comment