MZP in tunkar chhung ngeia bang turin MPSC Chairman an phut thu an sawi

Mizo Zirlai Pawl (MZP) General Hqrs. chuan Mizoram Public Service Commission (MPSC) Chairman chu tunkar chhung ngeiin bang se an duh thu sawiin, “Kan ngenna in awmzia a neih loh chuan, Chairman ban a nih ngei theih nan MZP chuan a tul angin hma a la zel dawn a ni,” an ti.

Nimin khan Aizawl Press Club-ah thuthar thehdarhtute kawmin MZP General Hqrs. hruaitute chuan Mizoram Public Service Commission (MPSC)-in February ni 1, 2024-a result a tihchhuah tak Combined Competitive Examinations kalpui danah thil fel tawklo leh chhui chian ngai thil a awm ngei nia an hriat thu leh hemi chungchang hi March 27, 2024 khan thuchhuah siamin, Mizoram-a hna sang leh zahawm tak tak latu MPSC chhûngah hetiang thil hriat tur a awm chu pawi an ti takzet tih an sawi a. Mizoram-a hna sang leh zahawm tak takte lak hna MPSC-in a kalpui thin chu thalai hna zawng mekte pawhin an ringtawk thinin, engemaw sawi a awm chang pawhin a hmingchhiat mai loh nan MZP chuan a thlawp tlat thin niin an sawi bawk.

MZP hruaitute chuan Combined Competitive Examinations kalpui hnuhnung berah thil dik tawk lo-a hmalakna a awm ngei nia an hriat thu sawiin, “Mains Exam paper thenkhatah Correcting Fluid-te hman niin, Mark pek tawhsa thaichhiatna leh Mark tihdanglamna hnuhma thahnem tak a awm a. Hei hi hmun hnih-khat mai ni lo, hmun tam takah a awm a ni,” an ti a. “MPSC hian heng Answer paper-te hi tunhma zawnga RTI Act. hmanga dilchhuah an remtih thin laiin, kumin ah chuan an remti ta lo thut a. A hnuah Certified copy pechhuak lovin 'Inspection without photograph' an phal leh a. Nawrna avangin a hnuah Phone a thlalak an phal leh chauh a ni,” tiin “MPSC hian an thil tih dik tawk loh avangin hlauh an neih vang a ni ang em? tih zawhna a awm phah hial a ni,” an ti.

MPSC hnuaiah hetiang sulhnu mak tak tak leh sawi neuh neuh a awm chu pawi an tih thu MZP chuan sawiin, Exam beitu lungawi lohna neite an dawnsawn danah pawh an inenfiah a ngai hle nia an hriat thu sawiin, “MPSC-in heng thil diklo leh fello siamthat tuma hmalate hi, ‘Tlin loh vanga rilru na thil tih’ ang lekah a chhuah fo mai a. Dik lo thei lo, tisual ngai lo leh sawisel thiang lo anga an inchhal chunga, Case an nei fote hi in enfiah se MZP chuan a duh bawk a ni,” tiin “MPSC hian an thil tih dik loh hi sawi mam tum leh Evaluator-te tihsualah puh reng lo in, an mawh ah la sela. MPSC zahawmna humhim a nih zel theih nan te, Zirlai hna zawng mek ten an rinna an nghah zel theih nan MPSC Chairman chu tunkar chhung ngei hian bang se kan duh a. Heng kan ngenna in awmzia a neih loh chuan Chairman ban a nih ngei theih nan MZP chuan a tul angin hma a la zel dawn a ni,” an ti bawk.