VC in hlawhfa rate bithliah

Serchhip Town Joint Village Council (VC) thukhawm chuan hlawhfa rate bithliah tharin mipui te hnena hriatpuina lehkha pekchhuah thin man an siam thar bawk.
Serchhip Town chhunga VC hrang hrangte inthlunkhawmna, Serchhip Town Joint VC hi nimin khan Serchhip Kawnpui VC Hall-ah an Chairman C. Vanlalsiamthara kaih-hruaiin an thukhawm a, Serchhip-a inhlawhfa rate tur siam tharin ni khat-ah Mipa in Rs. 500/- leh Hmeichhia in Rs. 450/- a ni tawh ang. Nimin a Serchhip Town Joint VC thukhawm hian VC atanga Hriatpuina lehkha an pekchhuah thin chu a man tur an bithliah thar a, ILP-ah hriatpuina pekchhuah man Rs. 100/- zel lain Income leh Residential Certificate lakna ah Rs. 10/- zel a ni anga, Motor Garage hriatpuina man ah Two Wheeler-ah Rs. 50/- leh Four Wheeler-ah Rs. 100/- lak a ni anga, ILP leh Garage tih loh hriatpuina lak thar man hi thla thar April, 2024 atangin lak tan tur a ni ang.

Serchhip Town Joint Village Council (VC) hian Serchhip Kikawn leh Sailiamkawn inkar kawngpui chu kumin April thla ralhma ngeia chei-tha turin NHIDCL hotute sawipui nise an ti a, beisei ang a nih loh chuan a tul anga hmalak nise an ti a. Ui khuahkhirh chungchang pawh Serchhip DC hmuin Order siam tura ngen nise an ti bawk.