Sazuk kaptu nia hriat mi pakhat man leh a ni

North Vanlaiphai Forest Range-a thawktute chuan Inrinni kalta, March 2, 2024-a Sazuk kaptu nia hriat North Mualcheng khaw mi pakhat chu manin nimin khan Court-a hruai a nih hnuah Serchhip District Jail-ah dahluh a ni.
Thudawn danin Serchhip District chhung North Mualcheng khuaa cheng Malsawmtluanga (49) chuan Inrinni khan Mualcheng tam, Tuichang lui bulah Sazuk a kap nia hriat a nih avangin niminpiah khan North Vanlaiphai Forest Range-a RO Zirtluanga Hnamte leh a thawhpuite chu North Mualcheng-ah hian kalin an chhui zui a, Malsawmtluanga te In-ah hian Sazuk sa nia hriat an chhum hmun leh Sazuk Lu manin a sa dang erawh a dahna hriat a ni lo thung a, heng Sa te bakah hian a Silai chu man sak nghal a ni bawk.


Malsawmtluanga hi Wildlife Protection Act 1972 hnuaiah thubuai siam sak niin nimin khan Serchhip District Court-a Chief Judicial Magistrate (CJM) hnenah rawn hruai niin nimin tlai vek khan Serchhip District Jail-ah dahluh nghal a ni. Tarlan tawh angin Inrinni vek khan East Lungdar khaw mi 5 te chuan Sailulak ramah Sazuk an kap nia hriat a nih avangin thubuai siam sak an lo ni tawh a, tunah hian Serchhip District Jail-ah dah mek an ni bawk a ni.

Comments

Popular News (Last 30 Days)

LPG man bithliah thar