SASCI hnuaia Work Order hum tawh te an hna thawh tir vek an ni dawn

PWD Minister Vanlalhlana chuan SASCI hnuaia Contract hna thawh tur Work Order hum tawh zawng zawngte chu an thawh tir vek dawn tih a sawi a, Chief Minister Lalduhoma chuan SASCI sum hmanga hnathawk, a hun chhunga zo hman lo te chu Utilisation Certificate pek an tum loh thu a sawi bawk.

Nimin-a Mizoram Legislative Assembly thutkhawm ah Member te zawhna chhangin PWD changtu Minister Vanlalhlana chuan nikum inthlan dawn hnaiah Sawrkar laipuiin Mizoram sawrkar chu SASCI hnuaiah loan cheng vbc. 500 a pe tih sawiin, nikum October 6 khan Expenditure Sanction a ni a, hei hi inthlan dawn boruak a ni a, inthlan puan hmain thenkhatin hna an thawk hman a, inthlan puan a nih hnuah Model Code of Conduct-in a phuar ta tih a sawi a. Hetihlai hian SASCI sum lo hmang hmasa tawh te’n ram rotling siam tum aiin inthlana Campaign Fund atana hman an tum ta zawk nia a lan thu a sawi a ni.

PWD Minister chuan SASCI loan hi PWD in a chang tam ber nia sawiin, SYS te, Health leh Tourism Department te pawhin chan ve thu leh SASCI hnuaia hnathawh turte chu an enchian chuan Field laihna tura tih chhungah School siamthat te, tui luankawr siam te a awm thu a sawi a, an sawrkar hnuah Contract hnathawk ngai lo te’n thawh ve an duh thu leh Work Order hum tawh te Cancel duhna a lian tih sawiin, mahse, anni chuan an tih loh thu a sawi a. An sawrkar in hna tha an duh tih sawiin, a endikna kawngah sawrkar chauh ni lovin MLA zawng zawngte endik turin a sawm a, hna tha lo te Bill an pek dawn loh thu te, Restricted Tender tha an tih loh thu te, a tam thei ang ber Open Tender-a an tih dawn thu te a sawi bawk.

SASCI sum hmanga hnathawh chung-chang hi House Leader Lalduhoma chuan sawi zuiin SASCI hnuaia Contractor lo ni tawh te, Work Order lo hum tawh te pakhat mah cancel an nei lo tih sawiin, pakhatmah Bill of Quantity ziahluih tir an neih loh thu a sawi a. Hetihlai hian mi pakhat hmingin hna an hmu a, a hnuaiah Sub-Contract amount inzat lo thluahin Party Worker mi 10, 20 an intlar thla a, chungzingah chuan hna la thawk miah lo leh thawk nelnual an awm tih sawiin, heng mite pawh hi contractor hming pakhata kal a nih avangin a vaiin thawk tawh angin an ngaihsak zawk tih a sawi a. Tun Financial Year-a lapse tur a nih tawh avangin 2ns Instalment pawh a beiseiawm loh sa niin a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man