MNF hruaitu thlanna ah Official Candidate te chuhtu awm lova tling-ah puan an ni

Tun thla ni 15-a MNF General Hqrs. hruaitu thlanna neih turah Official Candidate te chu chuhtu awm lova tling-ah puan an ni.

MNF Party hian nimin khan Aizawl-a Mizo Hnam Run-ah Mizo National Day vawi 58-na puala hun hmangin MNF General Hqrs. Elected Office Bearers thlan tharte puanchhuahna hun an hmang a, he hunah hian MNF General Election Returning Officer Dr. Zoramdinthara chuan kum 2024 - 2027 chhunga MNF General Hqrs. hruaitu (Elected OB) atan President-ah Zoramthanga; Sr. Vice President-ah Dr. R. Lalthangliana; Vice President-ah Vanlalzawma leh Lalchhamdama Ralte bakah Treasurer-ah Lalruatkima te chu chuhtu awm lovin tling ah a puang a. MNF General Hqrs. hruaitu thlanna hi tun thla ni 15-a neih tura ruahman ni mah se fficial Candidate tura ruahman te bak inthlan chuhtu an awm loh avangin heng mite hi chuhtu awm lova tling-ah puan an ni a. Nimin-a he hun hmanna ah hian MNF President atana thlan thar Zoramthanga bakah OB thar te hian thu an sawi a, Rev. Lalzuithanga chuan heng hruaitu thar te Pathian hnena hlanna hun a hmang bawk a ni.

MNF Sr. Vice President Tawnluia kaihhruaia Mizo National Day vawi 58-na puala hun hman ah hian MNF President Zoramthanga chuan Mizo Hnam-in zalenna nei tura an beih tanna ni kan lo thleng leh ta chu a lawmawm takzet tih sawiin, “Pu Laldenga leh khatihlaia MNF hruaitute khan buai pumbelh hram an tum a. Mahse, Assam CM PB. Chaliha chuan inbiak a duh tawh lo a, sipai a rawn tirhluh tak avangin silai a puak ta a ni,” tiin Silai puah chhana mawhphurtu chu India saworkar a nih thu a sawi bawk a. Mizo Hnam nationalism chu thisen-a baptist tawh a ni tih sawiin, “Chu nationalism kengtu chu MNF Party a ni. Party dang ang kan ni lo a, ‘Pathian leh kan ram tan’ tia kan din tlatna hi kan felnaah Pathian in a ruat a. MNF hian hniam lai chu a nei ngei a, mahse, Pathian hruaina in a tho kang leh thin a ni,” a ti a. “MNF hi Pu Laldenga emaw, Pu Zoramthanga emaw awihnun a ni lo a. Mizo Hnam te hi khawvel hnam tin zinga Krista chanchin tha hril tura koh kan ni a, chumi tura he ram leh he hnam buatsaih hi MNF dinchhan leh tum bulpui ber a ni,” a ti bawk. MNF President chuan Mizo Union te, PC Party te an lo ral tawh tih sawiin, “Congress pawh an hniam ta hle. MNF erawh chu kum 60 chuang Pathian in hun harsa leh khirh tak karah pawh min hruai zel a ni,” a ti a. “ZPM pawh hnatlang party an nia, belkeh phuarkhawm ang mai an ni a, an kehdarh chu a nasa viau ang,” a ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man