Mizoram-a Jail hrang hrang te tih phuisui tum a ni
Home Minister K. Sapdanga chuan Mizoram a Jail ho tihlen tumna a awm loh thu sawiin, “Tih phuisui erawh tum a ni,” a ti.
Nimin-a Assembly inkhawm ah ZPM MLA Lt. Col. Clement Lalhmingthanga zawhna chhangin Home Minister chuan, “Champhai leh Khawzawl in an intawm District Jail chu tihlen tumna a awm rih lo,” tiin, thawktu indaihlohna leh sum harsatna avangin Khawzawl District Jail nei turin hmalakna a awm rih loh thu a sawi a. Zawh belhna chhangin, SASCI hnuaiah Jail tihchangtlunna atan cheng nuai 750 dah a nih thu leh he sum hmang hian District hrang hrang Jail-te tih phuisui a ni dawn tih a sawi. Hei bakah hian ramri hnaiha Police Station te lirthei thuamthat a ngai tih sawrkarin a hriat thu a sawi bawk.Home Minister chuan ramri hnaiha Police Out-Post te a theih ang anga tih changtlun tum a nih thu pawh sawiin, ramri a venhimna tichak zel turin Police te hmunhman tihchangtlun tum a nih thu leh Out-Post hrang hranga lirthei chhia avanga harsatna pawh enzui tum a nih thu a sawi a, tun dinhmunah Bungthuam IR Police Out-Post awm mek hi tihtawp tumna a awm lo a tih bakah, sawrkar hmasa a din tura ruahman Lengpui Out-Post chu thawktu indaih deuh hunah hmalak chhunzawm tum a ni tih a sawi bawk a. Police ten an dawn thin, Rifle Allowance Rs. 40/- ni thin chu a leta tihpun a nih thu a sawi bawk.
Comments
Post a Comment