IR Bn. din Mizoram tihsual lianpui a nih thu CM in a sawi

Chief Minister Lalduhoma’n IR Battalion din chu Mizoram in a tihsual lian pui a nih thu a sawi.

Nimin-a Assembly thutkhawmah Chief Minister Lalduhoma chuan IR Battalion chu Mizoram ta a ni lo tih sawiin, “Mizoram thuhnuaia awm a ni lo bawk a, Sawrkar laipuiin duh hun huna a tirh-chhuah thin a ni,” a ti a, Mizoram pawna an tirh-chhuah pawhin an hlawh leh an senso zawng zawng State sawrkar tum vek a nih thu sawiin, “Mi State te Police tur Mizoram sawrkarin a tum kep a ni ringawt a, a atthlak takzet a ni,” a ti a. Sawrkarin a lak hunlaiin State sawrkar hnuaia awm tur Mizo Battalion din turin a nawr naa a hunlaia thuneitu ten Police-a an mite thun chak avangin an ti tlang lui tlat nia sawi bawkin, tunah hian mi fahrawn enkawl angin mi fa an chawm reng a, tihtawp a ni thei tawh si lo a, a pawi takzet a ni, a ti.

Chief Minister chuan Mizoram a Police te chu an fit lo hle nia sawiin, kut vung, ke vung, Minister te PSO atan pawha itawm loh tak tak te an ni tih a sawi a, PSO Training mang lova Certificate nei te pawh an awm nia sawiin, hetiang bawk hian an fate zirtirtu atana an duh miah lo tur tam tak zirtirtu lak an ni bawk niin a sawi a ni.

Chief Minister chuan nimin-a Assembly Inkhawm ah hian Aizawl atanga Assam Rifles te sawn chungchang ah Mizoram sawrkar in a tih tur tih loh ala nei em tih a zawhchian tir mek tih sawiin, an chhuahsan tur ram pawh chinfel ala ni lo tih a sawi a. Sipai te chhuahsan tura ram nei zingah mi 13 ten an LSC sawrkar-ah an pe tawh tih sawiin, lawmawm a tih thu leh cancel fel a ni tawh tih a sawi a. Tunah hian Show Couse Notice pek ngai mi 41 an awm thu leh pek an nih tawh thu sawiin, mi 10 laiin sawrkar chu Court-ah an khin thu a sawi a. Heng mite nen hian inbiakna nei tura ruahmanna siamin ram leh hnam tana tlawmngai taka ram pelet tura ngen tum an nih thu a sawi a, tlawmngai thei lo an la awm a nih chuan sawrkar chuan a thuneihna a hmang mai turah an ngai tih a sawi bawk.