EMRS kalpui dan tur sawiho

Mizoram Eklavya Model Residential School (EMRS) Society Executive Committee chu nimin khan Aizawl-a Secretariat Conference Hall-ah thukhawmin kumin chhunga Mizoram hmun hrang hrang, Bilkhawthlir (Kolasib District), Niawhtlang (Siaha District) Tlangnuam (Aizawl District), Tlungvel (Aizawl District) leh Zawl-nuam (Mamit District)-a EMRS hawn thar tur chungchang an sawiho a, School hawn thar turte hi Class 6 leh 7 niin CBSE hnuaiah zirna hi kalpui a ni ang. Ministry of Tribal Affairs kaltlangin EMRS hi India ramchhunga Tribal mi te’n zirna tha leh rintlak an hmuh theihna atana kalpui niin, a thlawn vekin naupang ten zirna kaihhnawiha an mamawh pek an ni a, Residential (Hostel) Campus-ah heng School te hi kalpui a ni. Mizoram chhungah hian EMRS kalpui mek 6 awmin, chungte chu Ser-chhip, Lawngtlai, Chawngte, Siaha, Tuipang leh Ngopa te an ni a, School 5 hawn belh tur nen hian Mizoram chhungah School 11 neih a ni ang.