Seat 40 awmna Mizoram Assembly-ah ZPM in seat 27 lain sawrkar thar an siam dawn

Kum 2023 Mizoram State Assembly Inthlanpui-a Vote tla te chu nimin khan chhiar a ni ta a, Seat 40 awmna ah Zoram Peoples Movement (ZPM) chuan Seat 27 lain Party mal-a sawrkar siam thei turin hnehna an chang a, Rorellai MNF Party chuan Seat 10 lain Chief Minister leh Minister nilai engemaw zat an tling zo lo a ni.

Kumin November 7-a Mizoram Assembly Inthlapui a Vote tla te chu nimin khan District khawpui hrang hrangah tluang taka chhiar niin Zoram Peoples Movement (ZPM) chuan Seat 40-ah Seat 27 lain Party mal-a sawrkar siam thei khawpin hnehna an chang a, Sawrkar lai MNF Party chuan seat 10 lain BJP chuan Seat 2 an lak bakah Congress chuan Seat khat an la a ni. Rorellai MNF party hian kum 2018 MLA inthlanah Seat 26 laiin, by-election-ah Seat hnih an lak belh a, Seat 29 an nei a. Tun tum inthlanah chuan Seat 10 laiin, inthlan hmasa leh a hnua an lak belh nena chhut chuan term hmasa aiin MLA 19 in an nei tlem zawk a. Kum 2018 MLA inthlana seat 5 latu Indian National Congress (INC) chuan Seat 1 chiah laiin MLA pakhat chiah neia inthlan hmachhawn BJP chuan MLA pakhat neih belhin Seat hnih an la a ni. Inhnehna sang ber chu Aizawl North-II bial-a ZPM Candidate Dr. Vanlalthlana'n MNF candidate Vanlalsawma a hnehna vote 6,507 a ni a, inhnehna tlemna ber chu Lengteng bial-a ZPM candidate F Rodingliana'n MNF candidate Dr. L. Thangmawia a hnehna niin, F Rodingliana hian vote 47 in hnehna a chang a ni.

Serchhip District chhung Assembly Bial pathum-a Vote tla te pawh nimin zing dar 8:00 atang khan chhiar niin harsatna leh buaina awm lovin tluang taka chhiar zawh a ni a, Serchhip District chhunga Assembly Bial pathum-ah ZPM party chuan Seat awm zawng zawng lain MNF chu pahnihna leh INC chu pathumna an ni vek a. Serchhip Bial-ah Polling Station 29 awm ah ZPM Ticket-a ding Lalduhoma chuan Polling Station 26-ah Vote hmu tam ber dinhmun a luah a, MNF Ticket-a ding J. Malsawmzuala Vanchhawng (Serchhip-VIII) leh R. Vanlaltluanga (Thenzawl-III leh Buangpui) ah te Vote hmu tam ber an ni ve thung a, Lalduhoma hian amah hnaih bertu J. Malsawmzuala Vanchhawng hi 2982 in a hneh a ni.

Tukum Bial-ah ZPM Candidate PC. Vanlalruata chuan amah hnaih bertu Bialtu MLA nilai Er. Lalrinawma chu Vote 2161 in a hneh a, an bial-aa Polling Station 32 awm ah PC. Vanlalruata hi Polling Station 28-ah Vote hmu tam ber niin Er. Lalrinawma hian Polling Station 4-ah Vote hmu tam ber dinhmun a luah ve bawk a ni. Hrangturzo Bial-ah pawh ZPM Candidate Lalmuanpuia chuan amah hnaih bertu MNF Candidate Lalremruata Chhangte chu Vote 1255 in a hneh bawk a, an Bial-a Polling Station 27 awmah Lalmuanpuia Punte hian Polling Station 21-ah hnehna changin Lalremruata Chhangte hian Polling Station 6-ah hnehna a chang ve bawk.

Serchhip Bial-a thlantlin ZPM Leader leh Chief Ministerial Candidate Lalduhoma chuan thuthar thehdarhtute zawhna chhangin Campaign laiin Bial dang a vilpui avangin Serchhip bial-ah chawlhkar khat tha vel chauh hun a neih thu a sawi a. Kum 2018 leh by-election ah te Serchhip bial-ah thlantlin a nih tawh thu sawiin, a tum thumna atana hnehna chantirtu Serchhip Bial mipuite chungah lawmthu a sawi a, “Keini Party chakna a ni lova, Bial mipuite chakna a ni,” a ti a. “Opposition MLA anga nekbehna kara harsa taka kan in enkawl kha Vawiin ah chuan sawrkar chakna nen kan in enkawl ve thei tawh dawn a. Kan hmalak dan tur chu kan VC te, kan NGO hrang hrangte leh Party te nan kan la sawi khawm anga, chuta tul kan tih ang ang chu hma kan la chho dawn a ni,” a ti. Inthlan zawh hnuah assessment an tih ngun thu leh an uluk thu sawiin, an beisei ang vela hnehna an chan thu a sawi a. Sawrkar thar lakluh a nih hnuah ni 100 chhunga an ngaih pawimawh tur an puanchhuah phawt tur thu a sawi bawk.