MNF in SEDP atanga Sem policy an kalpui chu ZPM sawrkar-ah tihtawp vek a ni dawn

Zoram People’s Movement (ZPM) Leader Lalduhoma chuan MNF in SEDP atanga Sem policy an kalpui chu an sawrkar-ah an titawp vek dawn tih a sawi a, Health Care Scheme pawh a tha zawk an duanin a thlak dawn tih a sawi bawk.

Assembly Inthlanpui neih zawh a nih hnua sawrkar siam thei dinhmuna an din hnuah thuthar thehdarhtu thenkhat ten an kawmna ah ZPM Leader Lalduhoma chuan an sawrkarah Sem Policy chu an titawp dawn tih a sawi a, “Engkim a thar dawn,” a ti a, tun dinhmunah sawrkar Budget hmasa an khawm rih a ngaih avangin thil lian tham a la tih theih dawnloh tih sawiin, nakum-a an Policy anga duan Budget an pharh hunah erawh thil a danglam dawn tih a sawi a. An sawrkar chhan ber chu an Manifesto zawrh chu mipuiten an duh vang a nih thu sawiin, Ban-a kaih Policy chu mipuiten an vote chhan ber anih avangin a tih hlawhtlin chu an hna pui ber a ni ang tih a sawi a. Minister tin ten Department an enkawl dan tur pawh ziakin an nei sa tih sawiin, Larsap hnen atanga Rinawmna thutiam an lak zawh hnuah sawrkar in ni 100 chhunga an tih tur an puang dawn tih a sawi a, Budget puitling nakum-a an pharh hunah erawh sawrkar kum khat (1) chhunga an tih tur an puang leh ang tih a sawi bawk.

ZPM Leader chuan Congress leh MNF ten Mizoram tan theihtawp an lo chhuah thin tih pawh sawiin, a hunlaia Pathian pekah a pawm tih a sawi a. Thil tam tak Mizoram tan an hnutchhiah a, hmasawnna ruangam an lo duan tawh te leh thil tam tak hma an lo lak te pawh a awm tih sawiin, sawrkar hmasa tih anih avanga hnawl sak emaw, tihtawp emaw an tum lo tih a sawi a, ram mamawh anih chuan a tul leh tha apiang chu an chhunzawm zel dawn tih a sawi a. Zo hnahthlak raltlan te chu tu pawh sawrkar se a tha thei ang bera enkawl a pawimawh thu pawh sawiin, Manipur a mi te chu India khua leh tui tho an nih avangin tha taka enkawl an ngai zual tih a sawi a, Union Home Minister nen an inbiak thu leh Delhi lamah chhuk vata Sawrkar laipui nen inbiakna an nei dawn tih thu a sawi bawk.

Mipuiten sawrkar tharah chak deuh zawka hmasawn an beisei tih pawh ZPM Leader chuan sawiin, eirukna laka fihlim hruaitu an hmu duh a, hetiang nih tum turin sawrkar kaihhruai chu a pawimawh a, mipuite beiseina ti beidawngtu nih loh an tum dawn tih a sawi a. Inthlanna an chakna zat chu an beisei ang vel nih thu pawh sawiin, inthlan zawh apianga Legislature Party Meeting a awm thin angin nizan khan an Party pawh an thukhawm dawn tih a sawi a, Val Upa in Leader tur ruat tawh mahse dan awmsa zawmin Leader an thlan leh dawn thu leh, sawrkar thar lakluhna pawh mi tihdan anga awlsam anga tih mai an duh tih a sawi bawk.