CS in ‘Mizoram Savate’ Lehkhabu a tlangzarh

Mizoram-a Sava chi hrang hrang 275 te a lem nena tarlanna lehkhabu, ‘Mizoram Savate’ (Mizoram Birds Illustrated) chu nimin khan Chief Secretary Dr. Renu Sharma chuan a tlangzarh.

Lalram Thanga leh Lalmalsawme (fam) te buatsaih he lehkhabu tlangzarhna hun Chief Wildlife Warden Conference Hall, Aizawl-ah neih ah hian Chief Secretary chuan hetianga lehkhabu hlu tak, Mizo tawng ngeia ziak a ni hi lawmawm a tih thu a sawi a, nungcha humhalh kawngah mipui zirtira kaihruaitu pawimawh tak a nih a beisei thu a sawi bawk.

He lehkhabu-ah hian Mizoram-a Sava chi hrang 275, a lem nena an ziah a awm a. Mizoram-a sava zirna hmasa ber neih a nih dan te, Sava hriatchian leh chhinchhiah dante leh Sava zir turin tih tur leh tih theihte tarlan a ni a. Lehkhabu tlangzarh rual hian Lalram Thanga kutchhuak sava leh ramsa lem thinga ker 50 chuang phochhuah chu mipui te en theih turin PCCF/Principal Secretary, EF&CC Department RS Sinha chuan a hawng nghal bawk.