Inthlanpui neih tur atana Campaign theih hun naktuk tlai dar 4:00-ah a tawp dawn
Assembly Inthlanpui neih tur atana inbuatsaihna kal mek chungchangah Serchhip District Election Officer David Lalthantluanga chuan nimin chawhnu khan Serchhip DC Meeting Hall-ah Serchhip District-a thuthar thehdarhtute kawmin karleh Thawhlehni, Nov. 7-a Assembly Inthlanpui neih turah hian Vote thlak hun tawp atanga chhiarlet-a darkar 48 chhung chu ‘Silence Period’ a nih thu leh hei hi Mizoram-ah chuan November ni 5, 2023 (Sunday) tlai dar 4:00 a nih thu a sawi a. “Hemi hnu lamah hian Candidate leh Politician te bakah mimal tute mahin campaign phal a ni tawh lo. Electronic Media-ah te Political Advertisement tihchhuah theih a ni tawh lo a. Voter te rilru sukthlek kaihhruai thei thil reng reng, Interview a ni emaw, Debate a ni emaw, sawihona a ni emaw, eng chi mah tih chhuah phal a ni lo,” a ti a. Hei bakah hian Vote thlak tan darkar leh khar fel atanga darkar chanve inkarah Exit Poll siam phal a ni lo tih sawiin, “Vote thlak zawhfel hun bituk atanga chhiarleta darker 48 chhung Silence Period-ah Opinion Poll siam phal a ni lo. Heng hian Media zawng zawng, Social Media (Youtube, Facebook etc) thlengin a huam vek a ni,” a ti.
District Election Officer (DEO) chuan Inthlanpui neih turah hian November ni 7, 2023 (Thawhlehni) zing dar 7:00 atanga tlai dar 4:00-ah Vote hi thlak theih a ni dawn tih sawiin, Vote thlak tur te tan EPIC ken tur a ni tih a sawi a. EPIC ken tur nei remchang lo te tan Aadhaar Card, MGNREGA Job Card, Bank emaw Post Office emaw atanga pekchhuah thlalak chuanna Passbook, PAN Card, Driving license, Indian Passport, Labour Ministry pek chhuah Health Insurance Smart card te hmangin vote thlak theih a ni dawn tih a sawi bawk.
Vote thlak ni-ah hian kum upa te leh rualbanlo (Senior Citizen leh PwD) te tan Vote thlak tura an kal velna tur ngaihtuah a ni dawn tih pawh sawiin, “ELC volunteers ten kum upa leh PwD te hruai leh dah hna hi an thawk anga. ELC Unit awm remchan lohna ah chuan BLO ten pick up leh drop hi ruahmanna an siam ang. ELC te hian Survey neiin Transportation mamawh tur list an kawl vek tawh a. Transportation mamawh tur tan mahni bialtu BLO emaw, ELC Unit te hnenah in report zel theih a ni,” a ti bawk.
Serchhip District chhunga Polling Station 88-a Electronic Voting Machine (EVM) leh Voter-Verified Paper Audit Trail (VVPAT) hman turte chu peihfel a nih tawh thu leh Candidate symbol te bel niin Polling Day-a hman theih turin buatsaih fel a ni tawh tih DEO chuan a sawi a, hei bakah hian thlaveng-a dah turte pawh peihfel vek a nih tawh thu a sawi a. Vawiin hian Polling Party te chuan Training hnuhnung ber an neih dawn thu leh Serchhip District chhunga Polling Station te chu ni khat-a thlen theih vek a nih avangin karleh Thawh-tanni zing dar 8:00 atangin Polling Party te chu an chhuah tan dawn thu leh chawhnu dar 1:00 velah chuan chhuak kim hman tura beisei an ni tih a sawi.
He hunah hian Serchhip SP MS Dawngkima Inthlanpui atana venhimna chungchang ah hun engemaw chen atanga inbuatsaihna an kalpui tawh thu leh ruahmanna an peihfel tawh thu sawiin, Vawiin hian Zonal Officer turte pawh rawn thleng kim tura beisei an nih thu a sawi a. Inthlanna muanawm neih kawngah Serchhip District in hmingthatna a neih chu chhawmnung zel turin mipuite a chah a, zu leh ruihhlo khapna chu mipuite pawhin hre reng se a duh thu a sawi bawk.
He hunah hian Serchhip District-a Returning Officer pathum leh Serchhip DIPRO te pawh an tel bawk a ni.
Comments
Post a Comment