Inthlanna entawntlak buatsaih theihna Dan zawm kawnga mipui tanrualna vang a nih thu sawi

MNF President leh Chief Minister Zoramthanga chuan ramdangte entawn tlaka inthlanna buatsaih a ni leh thei chu Dan zawm kawnga ram mipuite tanrualna leh inpumkhatna that vang a nih thu a sawi.

MNF President chuan Mizoram Legislative Assembly General Election 2023 chu Pathian zarah boruak muanawm tak hnuaiah tluang tak leh hlawhtling takin kan nei zo leh ta tih sawiin, Pathian min hruaina ah an Party chuan lawmthu an sawi tih a sawi a. India rama State ralmuang ber Mizoram-ah democracy rama inthlanna awm tawhah chuan muanawm leh felfai ber, ram dangte entawn tlaka inthlanna buatsaih a ni leh thei chu Dan zawm kawnga ram mipuite tanrualna leh inpumkhatna that vang a ni tih sawiin, “ Election Commission of India press note-ah pawh mipuiin phur leh hlim takin 'Democracy Kûtpui' Mizoram in kan hman thu tarlan a ni. Hei hi thil lawmawm tak a ni a, Mizo mipuiten theihtawp chhuahin i vawnghim zui zel ang u,” a ti.

Inthlanna buatsaihtute leh buaipuitute, venhimna lam buaipuitu zawng zawngte chungah lawmthu sawiin Zoramthanga chuan, “Mizoram People Forum leh Political Party te thawhhona thuthlung angin - Inthlanna zalen, thianghlim, dik leh felfai a awm ngei theihna tur leh Sawrkar Inrelbawlna tha a awm theihna tura hmalakna pawh a hlawhtlinna kan hmu zel a. Hemi kawnga hmalatu MPF chungah lawmthu kan sawi a ni,” a ti a. Kan rama roreltu thlang tura mahni dikna leh chanvo hlen ngei duh, khua leh tui tha mawhphurhna hlentu ram mipui rawn pen chhuak zawng zawngte chungah lawmthu sawiin, “A bikin kum upa zawk mahni in lamah leh vote thlakna hmuna vote thlak tura rawn pen chhuakte chungah lawmthu kan sawi a ni,” a ti bawk.

Kumin inthlanpuiah hian ECI pawhin vote thlak tura inzirtirna nasa taka kalpuiin, Systematic Voters' Education and Electoral Participation (SVEEP) hmalakna kaltlangin kawng hrang hranga hmalak a nih thu pawh Zoramthanga chuan a sawi a, “ECI duan inkaihhruaina te, Supreme Court thupek leh Dan hrang hrangte tha taka kan zawm tlan avangin Inthlanna muanawm leh hlawhtling tak kan nei thei,” a ti a. Media hrang hranga thawktute inpekna leh thawhrimna avangin lawmthu a sawi bawk a ni.