Voters’ Awareness Rally nei

Assembly Inthlanpui nei tur atan Young Voters Festival Programme chu tunkar Nilaini khian a hawnna neih a ni dawn a, he hmalakna chi khat atan Zirtawpni khan Serchhip-ah ‘Voters' Awareness Rally’ neih a ni.
SVEEP, Serchhip District Election Office leh Govt. Serchhip College-a Electoral Literacy Club te tangkawp buatsaih Voters' Awareness Rally hi Serchhip Tuikhuah Veng Kawn atanga Serchhip Bazar tual thlengin neih a ni a, he huna tel te hi Tuikum Bial-a Asst. Returning Officer Gaston Vanlalhriatpuia chuan a vailiam a, MLA Election hmasa zawkah khan Serchhip District-ah vote za zelah 85 vel a tla a, rampum huap thlir pawhin a tha thawkhat hle tih sawiin, “Inthlanpui hmasa zawk aia tam kha kuminah hian tlin kan tum a, za-ah 90 tal kan tlin theih nan vote nei zawng zawngten vote thlak theuh tum ila, kan thiante leh kan chhungte pawh lo hrilh thar leh theuh ang u,” tiin he Rally-a tel te hi a sawm a ni.

He Rally kharna hun Serchhip Bazar-a neih ah Govt. Serchhip College Principal C. Lal-dintluanga chuan Voters’ Awareness Rally buatsaih a nih chhan leh thil tum te sawiin, thalai rual pung-khawm chu vote thlak pawimawhzia hriaa General Election lo awm turah vote thlak theuh turin a sawm a. Khua leh tui dik tak te chanvo vote thlak hi a hlut zia hre thar a, a tam thei ang berin vote kan thlak theih nan tan la turin a sawm a ni.

Voters’ Awareness Rally hi Young Voters Festival programme hnuaia hmalakna chi khat niin Young Voters’ Festival hi Govt. Serchhip College-ah ni thum chhung hman tum niin a hawnna hi tunkar Nilaini khian District Bawrhsap hova neih tum a ni a. He programme ah hian Vote thlak uar tura inzirtirna kawng hrang hranga kalpui a ni ang a, vote nei thar ten phur taka vote an thlak theihna turin programme hlimawm tak buatsaih tum a ni. Tun tuma Voters’ Awareness Rally-ah hian Govt. Serchhip College-a zirlai mi 50 chuang telin thuthar thehdarhtu thenkhat te pawhin an telpui bawk a ni.