Congress in Bairabi Hydel Project tih hlawhtlin tum

Mizoram Pradesh Congress Committee (MPCC) President Lalsawta chuan Congress Party an sawrkar a nih chuan Bairabi Hydel Project tih hlawhtlin an tum tur thu a sawi.

Congress Party, PC leh ZNP te telna Mizoram Secular Aliance hruaitute chuan Inrinni khan Bairabi Hydel Project hmunhma tlawhin he hunah hian MPCC President Lalsawta chuan Mizoram Secular Alliance-a an thawhpui PC Party-te rilru-a thi thei lo, ram rotling tur Bairabi Hydel Project chu Congress Party a sawrkar a nih chuan tihhlawhtlin an tum dawn tih sawiin, Brig T. Sailo khan Mizoram tan nasa takin ngaihtuahna a lo seng a, mi ropui tak, hruaitu tha a ni, a ti a. “Hmathlir a lo nei thuiin, thahnem a lo ngai em em a. A hmalakna tam tak hi chhunzawm zel tlak a ni,” a ti bawk.

MPCC President chuan tun dinhmunah Kohhran te’n rampawn atanga tanpuina, Foreign Funding an dawn theihna dan FCRA chu BJP sawrkarin a titawp tih sawiin, hei vang hian Kohhran leh Kohhran enkawl Damdawi In ten an tuar hle niin a sawi a. Central-a BJP chakna tihtawp a ngai tih sawiin, Mizoram-ah pawh BJP leh a thawhpui te, BJP thawhpui tumtute ho chu hneh ngei ngei an ngai niin a sawi bawk.

He hunah hian PC Party President Vanlalruata chuan ZPM te’n PC Sawrkar laia hma an lakna thenkhat la puitling lo tihhlawhtlin an tum thu an sawi a, chung zingah chuan Bairabi Hydel Project hi a tel lo nia sawiin, anni chuan an ngaih pawimawh ber a nih thu a sawi bawk.