Mizoram tana Gold Medal 4 latu lawmpuina hun hmang

Serchhip District Rifles Association (SDRA) chuan 10th North East Zone Shooting Championship neih zawh taka Mizoram tana Gold Medal pali (4) latu Saihmingthanga Sailo, Serchhip Ramthlun Veng chawimawina hun nimin khan an buatsaih.
SDRA Shooting Gallery, Serchhip a Saihmingthanga Sailo lawmpuina hun hi SDRA Executive Member Lalawmpuia Renthlei chuan kaihruaiin SDRA aiawhin Kaste Romalsawma chuan lawmpuina thuziak hlanin SDRA Asst. Secretary K. Vanrosanga chuan an pawl aiawhin lawmpuina thu a sawi a. SDRA President Lalbiak-dika chuan August 17-20, 2023 chhunga Shil-long-a 10th North East Zone Shooting Championship neih zawh taka Mizoram Team te kal dan leh Serchhip atanga kal Saihmingthanga Sailo in inelna a hmachhawn dan leh Medal a lak dan te a sawi a. Saihmingthanga Sailo S/o S. Thangthuama, Serchhip Ramthlun Veng hian he inelna ah hian 50m Peep Sight Rifle inkahsiakna ah Masters Category-ah Gold a la a, 50m Peep Sight Rifle-a Men Individual Category-ah Gold a la bawk. Heng bakah hian 50m Open Sight Rifle inkahsiak ah Masters Category leh Men Individual Category-ah Gold a la ve ve bawk.

Mizoram tana Gold Medal pali latu Saihmingthanga Sailo lawmpuina hunah hian Serchhip District Sports Committee (SDSC) atangin Sr. Vice President K. Tlangthanmawia leh MJA Serchhip District atangin an President C. Lalhminghlua te pawhin lawmpuina thu an sawi a. Medal latu Saihmingthanga Sailo pawhin tun tum inelna-a a tel theihna tura buaipuitu hrang hrangte chungah lawmthu sawiin, he inelna hmachhawn tura a inbuatsaih dan te a sawi bawk.